«10 РӮЗИ ИЛМ». Дар Агентии амнияти химиявӣ, биологӣ, радиатсионӣ ва ядроӣ ҳамоишҳои илмӣ оғоз шуданд

ДУШАНБЕ, 07.04.2026. /АМИТ «Ховар»/. 6 апрел дар Агентии амнияти химиявӣ, биологӣ, радиатсионӣ ва ядроии Академияи миллии илмҳои Тоҷикистон дар доираи ташаббуси «10 рӯзи илм» бахшида ба Рӯзи илми тоҷик силсилачорабиниҳои илмӣ оғоз ёфтанд. Дар ин хусус ба АМИТ «Ховар» аз ин агентӣ хабар доданд.

Иттилоъ дода шуд, ки дар доираи «10 рӯзи илм» дар агентӣ баргузории конференсияҳои илмии миллӣ ва байналмилалӣ бо иштироки мутахассисону коршиносон ва шарикони рушд аз дохил ва хориҷи ҷумҳурӣ ба нақша гирифта шудааст.

Иштирокчиёни ҳамоиш нақши илмро дар таъмини амнияти миллӣ, рушди устувори давлат ва таҳкими иқтидори илмӣ-техникии давлат, хусусан дар самти амнияти химиявӣ, биологӣ, радиатсионӣ ва ядроӣ муҳим арзёбӣ намуданд.

Баргузории «10 рӯзи илм» ҳамчун минбари муҳими муколамаи илмӣ, мубодилаи таҷриба, баррасии таҳдидҳои муосир ва таҳияи тадбирҳои амалӣ барои такмили фаъолияти минбаъда дар соҳаи амнияти химиявӣ, биологӣ, радиатсионӣ ва ядроӣ аҳамияти махсус дорад.

Дар ҷараёни ҳамоиш ба зарурати рушди илми амалӣ, дастгирии олимони ҷавон, густариши ҳамкории байналмилалии илмӣ ва ҷорӣ намудани технологияҳои инноватсионӣ таваҷҷуҳи махсус зоҳир карда шуд.

Агентии амнияти химиявӣ, биологӣ, радиатсионӣ ва ядроии Академияи миллии илмҳои Тоҷикистон бо баргузории ташаббуси «10 рӯзи илм» дар рушди илм, инноватсия, ҳамкории байналмилалӣ, инчунин таҳкими нақши ҷомеаи илмӣ дар ҳалли масъалаҳои мубраме, ки аҳамияти миллӣ ва минтақавӣ доранд, саҳм мегузорад.

АКС: Агентии амнияти химиявӣ, биологӣ, радиатсионӣ ва ядроии Академияи миллии илмҳои Тоҷикистон