Ҳамкории Тоҷикистон ва Беларус дар соҳаи иқтисоди рақамӣ ва технологияҳои иттилоотию коммуникатсионӣ тақвият меёбад

ДУШАНБЕ, 28.04.2026./АМИТ «Ховар»/. Масъалаҳои марбут ба тавсеаи ҳамкории дуҷониба байни Тоҷикистон ва Беларус дар соҳаи иқтисоди рақамӣ ва технологияҳои иттилоотию коммуникатсионӣ дар мулоқоти директори Агентии инноватсия ва технологияҳои рақамии назди Президенти Ҷумҳурии Тоҷикистон Хуршед Мирзо бо Вазири алоқа ва иттилооти Ҷумҳурии Беларус Кирилл Залесский баррасӣ гардиданд. Дар ин хусус АМИТ «Ховар» бо истинод ба Агентии инноватсия ва технологияҳои рақамии назди Президенти Ҷумҳурии Тоҷикистон иттилоъ медиҳад.

Мулоқот дар доираи ҷаласаи панҷуми вазирони соҳаи технологияҳои иттилоотию коммуникатсионии давлатҳои аъзои Созмони ҳамкории Шанхай дар шаҳри Бишкек баргузор гардид.

Ҷонибҳо инчунин оид ба татбиқи стратегияҳои миллӣ дар самти рақамикунонӣ, рушди зеҳни сунъӣ, муосирсозии инфрасохтори рақамӣ ва ҷорӣ намудани хизматрасониҳои давлатии электронӣ мубодилаи афкор анҷом доданд.

Таваҷҷуҳи махсус ба ҳамкорӣ барои ташаккули экосистемаи устувори инноватсионӣ, рушди муҳити мусоид барои фаъолияти стартапҳо, инчунин таъсиси марказҳои муштараки технологӣ ва платформаҳои рақамии ҳамкорӣ зоҳир гардид. Ҳамзамон масъалаҳо оид ба таҳкими амнияти киберӣ, рушди захираҳои инсонӣ ва баланд бардоштани сатҳи саводнокии рақамии аҳолӣ ҳамчун самтҳои афзалиятноки ҳамкорӣ арзёбӣ карда шуданд.

Дар анҷом мусоҳибон барои густариши минбаъдаи ҳамкории мутақобили судманд, табодули таҷрибаи пешқадам ва татбиқи ташаббусҳои муштарак дар самти рушди иқтисоди рақамӣ ва инноватсия изҳори омодагӣ намуданд.

АКС: Агентии инноватсия ва технологияҳои рақамии назди Президенти Ҷумҳурии Тоҷикистон