«АЗ НАВРӮЗ ТО НАВРӮЗ». Дар Донишкадаи давлатии санъати тасвирӣ ва дизайни Тоҷикистон ҷашни Наврӯзро таҷлил намуданд

ДУШАНБЕ, 04.04.2026 /АМИТ «Ховар»/. Дар Донишкадаи давлатии санъати тасвирӣ ва дизайни Тоҷикистон бахшида ба ҷашни Наврӯз ҳамоиши фарҳангию эҷодӣ баргузор гардид. Тавре ба АМИТ «Ховар» аз ин донишкада хабар доданд, дар ҳамоиш беш аз 60 асари рассомии омӯзгорону донишҷӯён таҳти унвони «Аз Наврӯз то Наврӯз» ба маърази тамошо гузошта шуд.

Дар асарҳо манзараҳои дилфиреби баҳор, ойинҳои наврӯзӣ, саҳнаҳои ҳаёти мардум, рамзҳои миллӣ ва эҳсоси зебоипарастии ҳунармандон таҷассум ёфтаанд. Меҳмонон ба маҳорати баланди рассомон баҳои баланд дода, иброз доштанд, ки чунин намоишгоҳҳо барои ташаккули завқи бадеӣ, рушди истеъдодҳои ҷавон ва муаррифии санъати миллӣ дар сатҳи баланд аҳамияти калон доранд.

Ректори Донишкадаи давлатии санъати тасвирӣ ва дизайн Сироҷиддин Ҷурахонзода оид ба аҳамияти рушди санъати тасвирӣ ва дизайни муосир дар заминаи анъанаҳои миллӣ иброз дошт, ки муассисаҳои таълимии соҳаи фарҳанг дар тарбияи насли нави эҷодкорон нақши калидӣ доранд. Маҳз тавассути ҳамгироии таҷрибаи анъанавӣ ва равандҳои муосир метавон сатҳи ҳунари миллиро ба марҳилаи нав бардошт.

Муовини Вазири фарҳанги Ҷумҳурии Тоҷикистон Фаридун Бобозода Наврӯзро ҷашни эҳёгар ва рамзи худшиносии миллӣ арзёбӣ намуда, иброз дошт, ки сиёсати фарҳангии давлат ба ҳифз ва рушди мероси ғании миллӣ, дастгирии аҳли эҷод ва густариши равобити байналмилалӣ равона гардидааст.

Солҳои охир ба рушди муассисаҳои таълимии соҳа, беҳтар намудани заминаи моддиву техникии онҳо ва фароҳам овардани шароити мусоид барои фаъолияти эҷодӣ таваҷҷуҳи махсус зоҳир мегардад.

Дар идомаи чорабинӣ меҳмонон дар саҳни муассиса бо растаҳои ҳунармандии факултаву кафедраҳо шинос шуданд. Дар ин гӯшаҳо намунаҳои гуногуни ҳунарҳои мардумӣ, аз ҷумла кандакорӣ, кулолгарӣ, заргарӣ, гулдӯзӣ, наққошӣ ва дигар навъҳои санъати амалӣ ба намоиш гузошта шуданд. Меҳмонон чунин ташаббусҳоро намунаи беҳтарини эҳёи ҳунарҳои мардумӣ арзёбӣ карданд.

АКС: Донишкадаи давлатии санъати тасвирӣ ва дизайни Тоҷикистон