БАРНОМАИ КАБУДИЗОРКУНӢ. Дар мавзеи баландкӯҳи Вору зиёда аз 12 ҳазор бех ниҳол шинонида шуд

 ДУШАНБЕ, 08.04.2026. /АМИТ «Ховар»/. Бо мақсади иҷрои бандҳои «Барномаи давлатии кабудизоркунии Ҷумҳурии Тоҷикистон барои давраи то соли 2040» ва татбиқи лоиҳаи «Барқарорсозии устувории ландшафтҳо дар Тоҷикистон» дар мавзеи баландкӯҳи Вору дар 20 гектар зиёда аз 12 ҳазор бех ниҳол шинонида шуд. Дар ин хусус АМИТ «Ховар» бо истинод ба Агентии хоҷагии ҷангали назди Ҳукумати Ҷумҳурии Тоҷикистон хабар медиҳад.

Дар ҷараёни ин иқдом аз тарафи кормандони Муассисаи давлатии хоҷагии ҷангали шаҳри Панҷакент дар ин мавзеъ ниҳолҳои гуногуни мевадиҳанда ва сояафкан, аз ҷумла зардолу, себ, бодом, олу, карағоч ва дигар намудҳо шинонида шуданд.

«Барномаи давлатии кабудизоркунии Ҷумҳурии Тоҷикистон барои давраи то соли 2040»  яке аз иқдоми муҳимми  мамлакати  мо дар самти ҳалли мушкилоти  обу иқлим  арзёбӣ мегардад.

Бояд гуфт, ки Тоҷикистон  минтақаи камҷангалтарини Осиёи Марказӣ маҳсуб шуда, масоҳати умумии фонди давлатии ҷангал ба 1,8 миллион гектар баробар аст. Аз ин масоҳат 422,7 ҳазор гектарро заминҳои ҷангалпӯш ташкил медиҳанд. Бинобар ин, ҷангалҳои Тоҷикистон ба қатори ҷангалҳои дорои аҳамияти муҳофизатӣ, обнигаҳдорӣ, санитарию гигиенӣ ва солимгардонӣ мансуб мебошанд. Вазифаи дар назди кормандони соҳаи ҷангал, сохторҳои дигари соҳа ва аҳолии мамлакат гузошта бунёд ва барқарор сохтани ҷангалҳои нав, нигоҳубин ва ҳифзи онҳо мебошад, ки имрӯз яке аз масъалаҳои ҳалталаб ба ҳисоб меравад.

Дар Тоҷикистон манбаъҳои бузурги табиӣ, аз ҷумла манбаъҳои обӣ зиёд буда, ҳифзи манбаъҳои обӣ аз ҳифзи ҷангалзор сарчашма мегирад. Аз байн рафтани баъзе намудҳои олами набототу ҳайвонот, зиёд шудани миқдори гази карбон дар атмосфера, ба амал омадани эрозияи хок, ки боиси ба вуҷуд омадани биёбон мегардад, албатта, ба фаъолият ва устувории ҷангалзор вобаста аст.

Аз ин хотир зиёд кардани дарахтон ва сарсабзнамоӣ имкон медиҳад, ки заминҳо аз эрозия ва шусташавӣ нигоҳ дошта шаванд.

АКС: Агентии хоҷагии ҷангали назди Ҳукумати Ҷумҳурии Тоҷикистон