Дар Академияи миллии илмҳои Тоҷикистон Даҳаи муаррифии илми академии тоҷик оғоз ёфт

ДУШАНБЕ, 07.04.2026. /АМИТ «Ховар»/. 6 апрел дар Академияи миллии илмҳои Тоҷикистон дар доираи Даҳаи муаррифии илми академии тоҷик конференсияи ҷумҳуриявии илмию назариявӣ баргузор шуд, хабар медиҳад АМИТ «Ховар» бо истинод ба академия.

Конференсия ба 35-солагии Истиқлоли давлатии Ҷумҳурии Тоҷикистон, «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф барои солҳои 2020-2040»,  Даҳсолаи байналмилалии «Об барои рушди устувор, солҳои 2018-2028», Солҳои рушди иқтисоди рақамӣ ва инноватсия (2025 – 2030),  Даҳсолаи байналмилалии амал оид ба илмҳои криосферӣ (2025-2034), Соли вусъат додани корҳои ободониву созандагӣ ва тақвияту таҳкими худшиносию худогоҳии миллӣ (2026) ва бузургдошти 1050-солагии Робиаи Балхӣ дар солҳои 2026-2027 бахшида шуд.

Президенти Академияи миллии илмҳои Тоҷикистон Қобилҷон Хушвахтзода иброз намуд, ки баргузории Даҳаи муаррифии илми академии тоҷик дар шароити муосир аҳамияти муҳим касб менамояд. Илми академӣ ҳамчун заминаи боэътимоди рушди устувори давлат ва ҷомеа дар татбиқи самараноки стратегияҳои миллӣ, пешбурди иқтисодиёти рақамӣ, тавсеаи равандҳои инноватсионӣ ва таҳкими иқтидори зеҳнии ҷумҳурӣ нақши калидӣ дорад.

Таъкид гардид, ки дар заминаи дастгириҳои пайвастаи Ҳукумати Ҷумҳурии Тоҷикистон барои рушди соҳаи илму маориф шароити мусоид фароҳам оварда шуда, имрӯз олимони тоҷик метавонанд дар ҳалли масъалаҳои муҳими иҷтимоию иқтисодӣ ва экологӣ саҳми арзанда гузоранд. Дар ин замина густариши таҳқиқоти бунёдӣ ва амалӣ, ҷалби ҷавонон ба илм ва ҳамкории байналмилалӣ аз самтҳои афзалиятнок арзёбӣ гардиданд.

«Дар замони ҷаҳонишавӣ ва рушди босуръати технологияҳои муосир, густариши фаъолияти илмӣ-таҳқиқотӣ ва истифодаи дастовардҳои илми муосир яке аз омилҳои асосии таъмини рақобатпазирии иқтисоди миллӣ ба шумор меравад. Дар ин замина ҷалби неруи зеҳнии ҷавонон ба илм, рушди ҳамкории байналмилалӣ ва татбиқи натиҷаҳои таҳқиқоти илмӣ дар истеҳсолот аз самтҳои афзалиятнок арзёбӣ гардиданд»,-гуфта шуд дар конференсия.

Олимону муҳаққиқон дар маърузаҳояшон оид ба натиҷаҳои илмии дар самтҳои гуногуни таҳқиқот, аз ҷумла фанҳои табиатшиносӣ, дақиқ ва риёзӣ, технологияҳои муосир, ҳифзи муҳити зист ва истифодаи самараноки захираҳои табиӣ бадастовардаашон маълумоти муфассал пешниҳод намуданд.

Бояд гуфт, ки дар муассисаҳои илмӣ-таҳқиқотии Академияи миллии илмҳо Даҳаи муаррифии илми академии тоҷик ду ҳафта идома ёфта, дар доираи он баргузории конфронсҳо, машваратҳо, суҳбатҳо, намоишҳои дастовардҳои илмӣ ва дигар чорабиниҳои илмиву маърифатӣ ба нақша гирифта шудааст. Дар доираи ин чорабиниҳо олимон, магистрантон ва докторантон маърузаи илмӣ намуда, натиҷаҳои таҳқиқоташонро муаррифӣ менамоянд.

АКС: Академияи миллии илмҳои Тоҷикистон