Дар Душанбе таҳкими ҳамкории Тоҷикистон бо БОР дар соҳаи обу энергетика баррасӣ шуд

ДУШАНБЕ, 07.04.2026. /АМИТ «Ховар»/. Масъалаҳои марбут ба таҳкими ҳамкории дуҷониба, аз ҷумла идоракунии самаранок ва устувори захираҳои об дар мулоқоти Вазири энергетика ва захираҳои оби Ҷумҳурии Тоҷикистон Далер Ҷумъа бо Директори Дафтари бахши кишоварзӣ, амнияти озуқаворӣ, захираҳои табиӣ ва рушди деҳоти Бонки Осиёии рушд Ҷиангфенг Жанг дар Душанбе баррасӣ гардиданд.

АМИТ «Ховар» бо истинод ба Вазорати энергетика ва захираҳои оби ҷумҳурӣ иттилоъ медиҳад, ки ҷонибҳо инчунин истифодаи оқилонаи имконияти гидроэнергетикӣ ва татбиқи лоиҳаҳои муштаракро муҳокима намуданд.

Таваҷҷуҳи асосӣ ҳамзамон ба масъалаи идоракунии самараноки захираҳои оби обанбори «Баҳри Тоҷик» равона гардида, ҷонибҳо аҳамияти стратегии онро дар таъмини амнияти обию энергетикии ҷумҳурӣ ва минтақа таъкид намуданд.

Дар ин замина зарурати амалӣ намудани усулҳои муосири идоракунӣ, такмили низоми мониторинг ва баланд бардоштани самаранокии истифодаи захираҳои об махсус таъкид гардид.

Ҳамзамон масъалаҳои марбут ба ҷалби сармоягузорӣ, татбиқи технологияҳои инноватсионӣ ва рушди иқтидори соҳавӣ низ баррасӣ шуда, ҷонибҳо барои густариши ҳамкорӣ дар доираи лоиҳаҳои афзалиятнок изҳори омодагӣ намуданд.

АКС: Вазорати энергетика ва захираҳои оби Ҷумҳурии Тоҷикистон