Дар Суғд маросими тантанавии гусели даъватшавандагон ба хизмати ҳарбӣ доир шуд

ДУШАНБЕ, 03.04.2026 /АМИТ «Ховар»/. Имрӯз дар Амфитеатри Қасри Арбоби шаҳри Хуҷанд маросими ботантанаи гусели даъватшавандагон ба сафи Қувваҳои Мусаллаҳи Ҷумҳурии Тоҷикистон баргузор гардид. Дар ин хусус АМИТ «Ховар» бо истинод ба хадамоти матбуоти Раиси  вилояти Суғд хабар медиҳад.

Раиси вилояти Суғд Раҷаб Аҳмадзода иброз намуд, ки хизмати ҳарбӣ қарзи муқаддаси ҳар шаҳрванди бонангу номус буда, ҳифзи марзу буми Ватан ва таъмини амнияту суботи давлат вазифаи асосии  ҷавонмардони ватандӯст маҳсуб мешавад. Хизмат дар сафи Қувваҳои Мусаллаҳ мактаби ҳақиқии мардонагӣ, ҷасорат, шуҷоат ва садоқат ба Ватан буда, дар он ҷавонон обутоб ёфта, ба ҳимоятгарони воқеии давлату миллат табдил меёбанд.

Ҳамзамон таъкид гардид, ки дар қисмҳои ҳарбии мамлакат бо ғамхориҳои доимии Сарфармондеҳи Олии Қувваҳои Мусаллаҳи Ҷумҳурии Тоҷикистон, генерали артиш муҳтарам Эмомалӣ Раҳмон тамоми шароити зарурӣ муҳайё мебошад.

Аз ҷавонон даъват карда шуд, ки бо ҳисси баланди масъулият, интизоми намунавӣ ва иродаи қавӣ хизмат намуда, Ватанро содиқона ҳимоя кунанд ва номи неки падару модарро баланд бардоранд.

Падару модарон низ фарзандонашонро бо дуои нек ва эҳсоси ифтихор гусел намуда, ба онҳо роҳи сафед, тансиҳатӣ ва хизмати шарафмандона орзу карданд.

Бояд гуфт, ки дар нахустин рӯзи гусели даъватшавандагон дар вилояти Суғд нақшаи муқарраршуда 46 фоиз иҷро гардид.

Маъракаи даъвати баҳории шаҳрвандон ба хизмати ҳарбӣ дар вилояти Суғд муташаккилона идома дошта, ҷавонони зиёде бо руҳияи баланд барои иҷрои қарзи шаҳрвандӣ- ҳифзи марзу буми Ватан омода ҳастанд.

АКС: Хадамоти матбуоти Раиси  вилояти Суғд