Оид ба саҳми олимони ҷавон дар таҳқиқи таърихи халқи тоҷик ҳамоиши илмӣ-назариявӣ доир шуд

ДУШАНБЕ, 12.04.2026. /АМИТ «Ховар»/. Дар Институти таърих, бостоншиносӣ ва мардумшиносии ба номи Аҳмади Дониши Академияи миллии илмҳои Тоҷикистон таҳти унвони «Саҳми олимони ҷавон дар таҳқиқи таърихи халқи тоҷик» ҳамоиши илмӣ-назариявӣ баргузор гардид, хабар медиҳад АМИТ «Ховар» бо истинод ба институт.

Дар ҳамоиш дастовардҳои илмии олимони ҷавон, муаррифии натиҷаҳои таҳқиқот ва табодули таҷрибаи илмӣ дар самтҳои гуногуни таърих, бостоншиносӣ ва антропологӣ баррасӣ шуд. Ҳамзамон аҳамияти рушди илм, нақши олимони ҷавон дар таҳқиқи таърихи халқи тоҷик ва зарурати ҷалби онҳо ба корҳои илмӣ таъкид гардид.

Олимони ҷавони институт дар мавзуъҳои «Нақши гули лола дар деворнигораҳои Панҷакенти қадим», «Маводи нави антропологӣ аз таҳгӯрхонаи ёдгории Искодар», «Сарчашмаҳои ҳуқуқии ҳифзи мероси таърихиву фарҳангӣ дар Тоҷикистони соҳибистиқлол» ва «Коркарди ранг тибқи «Баёну-с-синоот»-и Ҳубайши Тифлисӣ» маъруза намуданд.

Дар мубоҳисаҳои судманд аҳамияти таҳқиқоти минбаъдаи илмӣ, махсусан саҳми олимони ҷавон дар рушди илми таърих иброз гардид. Гуфта шуд, ки баргузории чунин чорабиниҳо барои баланд бардоштани сатҳи дониш, таҳкими ҳамкории илмӣ ва рушди мактаби илмии миллӣ нақши муҳим доранд.

АКС: Институти таърих, бостоншиносӣ ва мардумшиносии ба номи Аҳмади Дониш