Фиристодаи махсуси СММ: «Давлатҳо бояд сиёсатҳо ва амалҳоро тағйир дода, сармоягузорӣ ва татбиқи лоиҳаҳоро дар соҳаи идораи захираҳои обӣ ба роҳ монанд»
ДУШАНБЕ, 26.05.2026 /АМИТ «Ховар»/. Шароити ҷаҳони муосир, замоне, ки ҷаҳон ба тафриқа ва номуайянии афзоянда рӯ ба рӯ аст, ба мо хотиррасон мекунад, ки дар масъалаи об, хусусан истифодаи оқилона ва самараноки он тадбирҳои муассир андешем. Чунин иброз намуд Фиристодаи махсуси Дабири кулли Созмони Милали Муттаҳид оид ба захираҳои об хонум Ретно Марсудӣ 26 май дар маросими оғози Конфронси 4-уми байналмилалии сатҳи баланд оид ба Даҳсолаи байналмилалии амал «Об барои рушди устувор», солҳои 2018-2028 дар шаҳри Душанбе.
Фиристодаи махсуси Дабири кулли Созмони Милали Муттаҳид гуфт, ки об ба башарият на танҳо барои рафъи хатарҳо, балки барои бунёди ҳамкорӣ, устуворӣ ва рушди босуботи муштарак имконоти и васеъро фароҳам овардааст.
Дар пешбурди рӯзномаи ҷаҳонии об давоми солҳои охир Раванди оби Душанбе ва ташаббусҳои Президенти Чумҳурии Тоҷикистон муҳтарам Эмомалӣ Раҳмон ба платформаи муҳим барои муколамаи шарикӣ ва амал табдил ёфтаанд. Хусусан Конфронси 4-уми байналмилалии сатҳи баланд оид ба Даҳсолаи байналмилалии амал «Об барои рушди устувор», солҳои 2018-2028 дар самти ҳалли масъалаҳои марбут ба обу иқлим ва ҳифзи пиряхҳо нақши муассир дорад. Он ҷомеаи ҷаҳонро ҳушдор медиҳад, ки дар муносибат ба об дурандешона ва оқилона рафтор намоянд.
Хонум Ретно Марсудӣ таъкид намуд, ки «мо ба марҳилаи рӯзномаи нави ҷаҳонии об ворид мешавем. Ин марҳила аз кишварҳои ҷаҳон ва созмонҳои минтақавию байналмилалӣ на танҳо музокирот, балки сармоягузорӣ, роҳҳои ҳалли миқёспазир, ҳамкории густурда ва иҷрои уҳдадориҳоро талаб менамояд. Барои суръат бахшидан ба татбиқи амалҳои об ҳамкории кишварҳо, шарикӣ ва маблағгузорӣ зарур аст».
Фиристодаи махсуси Дабири кулли Созмони Милали Муттаҳид гуфт, ки давлатҳо бояд сиёсатҳо ва амалҳоро тағйир дода, сармоягузорӣ ва татбиқи лоиҳаҳои хурду бузургро дар соҳаи идораи захираҳои обӣ ва таъмини амнияти обӣ ба роҳ монанд, инчунин дар ин самт дастгирӣ намудани кишварҳои дар ҳоли рушд зарур мебошад.
Марзия САИДЗОДА,
АМИТ «Ховар»
АКС: АМИТ «Ховар»
Дар Ваколатдор оид ба ҳуқуқи инсон бахшида ба ташаббуси навбатии ҷаҳонии Тоҷикистон ҳамоиш баргузор гардид
Тоҷикистон ва Қатар бахшида ба Соли байналмилалии маърифати ҳуқуқӣ дар Женева чорабинӣ баргузор намуданд
Дар Сангвор бахшида ба қабули Даҳсолаи байналмилалӣ оид ба таҳкими сулҳ барои наслҳои оянда ҳамоиш баргузор гардид
Ташаббусҳои ҷаҳонии Тоҷикистон дар соҳаи об ва иқлим дар Бангкок муаррифӣ шуданд
СУЛҲ НЕЪМАТЕСТ, КИ ТАМОМИ МИЛЛАТҲОВУ ДАВЛАТҲО БА ОН НИЁЗ ДОРАНД. Мулоҳизаҳои академик Қобилҷон Хушвахтзода дар ин мавзуъ
Дар Осорхонаи миллӣ бахшида ба Даҳсолаи байналмилалӣ оид ба таҳкими сулҳ барои наслҳои оянда ҳамоиш баргузор гардид
Дар ноҳияи Фирдавсӣ доир ба ташаббуси навбатии ҷаҳонии Тоҷикистон конференсияи илмӣ-назариявӣ баргузор гардид
Ташаббуси навбатии ҷаҳонии Тоҷикистон дар чаҳорчӯби ИДМ муаррифӣ карда шуд
ДАҲСОЛАИ ТАҲКИМИ СУЛҲ БА ХОТИРИ НАСЛҲОИ ОЯНДА. Ин ташаббуси бузурги глобалӣ барои сайёраи бехатар мебошад
Ташаббуси оламшумули Пешвои миллат дар самти таҳкими сулҳ ҷонибдорӣ ёфт
ТИРГОН ШЕБУ ФАРОЗИ САДСОЛАҲОРО ГУЗАШТА, ТО БА РӮЗГОРИ МО РАСИДААСТ. Иқтибосҳо аз суханрониҳои Президенти Тоҷикистон ба муносибати ин ҷашн
