Дар Вазорати мудофиа оид ба саҳми Артиши миллӣ дар таҳкими сулҳу субот ва Ваҳдати миллӣ ҳамоиш доир шуд

ДУШАНБЕ, 27.06.2026 /АМИТ «Ховар»/. Бо сиёсати хирадмандонаю инсондӯстонаи Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳ, генерали Артиш муҳтарам Эмомалӣ Раҳмон ва садоқати хизматчиёни ҳарбӣ дар саросари мамлакат ваҳдати воқеӣ таъмин гардида, Артиши миллӣ дар баробари дигар сохторҳои қудратӣ барои татбиқи Конститутсия ва қарорҳои Ҳукумати Ҷумҳурии Тоҷикистон саҳми арзанда гузоштааст. Чунин иброз гардид зимни ҳамоиши идона, ки дар Вазорати мудофиаи Ҷумҳурии Тоҷикистон бахшида ба Рӯзи Ваҳдати миллӣ баргузор шуд.

Тавре ба АМИТ «Ховар» аз Вазорати мудофиа хабар доданд, иштирокчиёни ҳамоиш аз нақши Артиши миллӣ дар таҳкими Ваҳдати миллӣ, пойдории давлатдорӣ ва ҳифзи арзишҳои миллӣ ёдовар шуданд.

Гуфта шуд, ки дар таърихи ҳар як миллат ва давлати соҳибистиқлол Артиши миллӣ ё Қувваҳои Мусаллаҳ на танҳо кафили амният ва ҳифзи марзу буми давлат, балки пояи устувори Ваҳдати миллӣ ва якпорчагии ҷомеа ба ҳисоб меравад. Дар Тоҷикистони соҳибистиқлол низ Артиши миллӣ дар таҳкими Ваҳдати миллӣ, пойдории давлатдорӣ ва ҳифзи арзишҳои миллӣ нақши назаррас ва сарнавиштсоз дорад.

Бо дарназардошти аҳамияти бузурги Ваҳдати миллӣ барои ҷомеа, ҳифзу гиромидошти он, бедор намудани ҳисси ватандӯстӣ ва ҳифзи арзишҳои миллию давлатӣ дар байни афсарону сарбозони Қувваҳои Мусаллаҳи Ҷумҳурии Тоҷикистон мактаби ҷасорату мардонагии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон пайваста омӯзонида мешавад. Ин раванд ҳамчун намунаи равшани татбиқи ваҳдати воқеии миллӣ дар сафи Қувваҳои Мусаллаҳ арзёбӣ гардид.

Рӯзҳои аввали таъсис Артиши миллӣ ҳамчун сутуни боэътимоди давлатдорӣ дар таҳкими суботу оромӣ, Ваҳдати миллӣ ва фазои сулҳу созиш саҳми бевосита гузоштааст. Маҳз бо садоқатмандии афсарону сарбозони Қувваҳои Мусаллаҳ ва таҳти роҳбарии Пешвои муаззами миллат муҳтарам Эмомалӣ Раҳмон мардуми Тоҷикистон тавонистанд 27 июни соли 1997 Созишномаи умумии истиқрори сулҳ ва ризоияти миллиро ба имзо расонида, дар роҳи бунёди давлати ҳуқуқбунёд, дунявӣ ва демократӣ қадамҳои устувор гузоранд.

Дар фарҷом дастаҳои варзишии ҷузъу томҳои ҳарбии Вазорати мудофиа, ки дар мусобиқаҳои варзишии бахшида ба Рӯзи Ваҳдати миллӣ маҳорати баланд нишон дода, сазовори ҷойҳои ифтихорӣ гардида буданд, бо Ҷоми мусобиқа, Сипоснома ва дигар туҳфаҳои хотиравӣ сарфароз гардонида шуданд.

АКС: Вазорати мудофиаи Ҷумҳурии Тоҷикистон