Донишгоҳи техникии Тоҷикистон ҳамчун муассисаи пешсаф дар нашрияи байналмилалии «Asia Education Review» муаррифӣ гардид

ДУШАНБЕ, 10.06.2026 /АМИТ «Ховар»/. Дар саҳифаҳои нашрияи бонуфузи байналмилалии «Asia Education Review» фаъолияти Донишгоҳи техникии Тоҷикистон ба номи академик Муҳаммад Осимӣ инъикос гардид. Дар ин хусус АМИТ «Ховар» бо истинод ба Донишгоҳи техникии Тоҷикистон хабар медиҳад.

Дар ин нашрия Донишгоҳи техникии Тоҷикистон ҳамчун яке аз донишгоҳҳои маъруф ва пешсафи Ҷумҳурии Тоҷикистон дар самти таҳсилоти муҳандисӣ, омодасозии мутахассисони баландихтисос ва рушди илму технология муаррифӣ гардидааст, ки ин аз эътирофи байналмилалии имкониятҳои илмӣ, таълимӣ ва инноватсионии муассиса дарак медиҳад.

Ин дастоварди муҳим натиҷаи сиёсати пайгирона ва фаъолияти мақсадноки муассиса барои рушди ҳамкории байналмилалӣ, густариши робитаҳои байнифарҳангӣ ва муаррифии иқтидори илмиву таълимии Ҷумҳурии Тоҷикистон дар арсаи ҷаҳонӣ мебошад. Нашри маводи иттилоотӣ дар ин маҷаллаи байналмилалӣ аз афзоиши таваҷҷуҳи ҷомеаи ҷаҳонӣ ба дастовардҳои донишгоҳ ва таҳкими мавқеи он дар фазои таҳсилоти олии байналмилалӣ шаҳодат медиҳад.

Инъикоси фаъолияти Донишгоҳи техникии Тоҷикистон дар нашрияҳои бонуфузи байналмилалӣ на танҳо дастоварди муҳим барои муассиса, балки нишондиҳандаи эътирофи иқтидорҳои илмӣ, таълимӣ ва инноватсионии Тоҷикистон дар арсаи ҷаҳонӣ мебошад.

Донишгоҳи техникии Тоҷикистон ба номи академик Муҳаммад Осимӣ минбаъд низ барои таҳкими ҳамкории байналмилалӣ, тавсеаи мубодилаи академӣ ва татбиқи лоиҳаҳои муштараки таълимиву илмӣ тадбирҳои муассир андешида, барои фароҳам овардани имкониятҳои нави рушди илм, технология ва таҳсилоти муҳандисӣ фаъолияти худро бо маром идома хоҳад дод.

«Asia Education Review»- нашрия ва платформаи пешбари соҳаи маориф дар Осиё буда, масъалаҳои рушди таҳсилот, ҳамкории муҳити академӣ ва саноат, инчунин имкониятҳои таҳсил ва рушди касбиро инъикос менамояд.

АКС: Донишгоҳи техникии Тоҷикистон ба номи академик М.С. Осимӣ