ФАРҲАНГИ СУЛҲИ ТОҶИКОН – НАМУНАИ СУЛҲ ДАР ҶАҲОН. Таҳти ин унвон ҳамоиши сиёсӣ ва маърифатӣ баргузор гардид

ДУШАНБЕ, 26.06.2026 /АМИТ «Ховар»/. Дар доираи ташаббуси нави Ҷумҳурии Тоҷикистон таҳти унвони «Даҳсолаи байналмилалӣ оид ба таҳкими сулҳ барои наслҳои оянда, солҳои 2027–2036», ки бо қатъномаи Маҷмаи Умумии Созмони Милали Муттаҳид қабул гардидааст, дар Кумитаи Иҷроияи Марказии Ҳизби Халқии Демократии Тоҷикистон ҳамоиши сиёсӣ ва маърифатӣ баргузор гардид. Дар ин хусус ба АМИТ «Ховар» аз Маркази иттилоот ва таҳлилии ин ҳизб хабар доданд.

Ҳамоиш таҳти унвони «Фарҳанги сулҳи тоҷикон – намунаи сулҳ дар ҷаҳон» баргузор шуда, зимни он иброз шуд, ки Тоҷикистон дар тӯли солҳои соҳибистиқлолӣ бо роҳбарии Пешвои миллат муҳтарам Эмомалӣ Раҳмон тавонистааст таҷрибаи нодири таъмини сулҳу субот, ваҳдати миллӣ ва ҳамзистии осоиштаро дар арсаи байналмилалӣ муаррифӣ намояд. Ин таҷриба имрӯз ҳамчун «модели сулҳи тоҷикон» мавриди омӯзиш ва таваҷҷуҳи ҷомеаи ҷаҳонӣ қарор гирифтааст.

Таъкид шуд, ки қабули қатъномаи Маҷмаи Умумии Созмони Милали Муттаҳид дар бораи эълон гардидани Даҳсолаи байналмилалӣ оид ба таҳкими сулҳ барои наслҳои оянда натиҷаи талошҳои пайгиронаи Тоҷикистон дар самти таҳкими фарҳанги сулҳ, таҳаммулгароӣ ва густариши ҳамкории созанда байни давлатҳо мебошад.

Дар рафти ҳамоиш иштирокчиён зарурати боз ҳам густариш додани корҳои тарғиботиву ташвиқотӣ байни ҷавонон, баланд бардоштани ҳисси ватандӯстӣ, худшиносии миллӣ ва масъулияти шаҳрвандиро таъкид карданд.

Гуфта шуд, ки ҷавонон ҳамчун неруи созандаи ҷомеа бояд дар роҳи ҳифзи дастовардҳои истиқлолият ва таҳкими пояҳои давлатдорӣ фаъол бошанд.

АКС: Маркази иттилоот ва таҳлилии Ҳизби Халқии Демократии Тоҷикистон