Муассисаҳои таҳсилоти ибтидоӣ ва миёнаи касбии Тоҷикистон бо озмоишгоҳҳои муосири таълимӣ таъмин гардиданд

ДУШАНБЕ, 07.06.2026 /АМИТ «Ховар»/. Аз ҷониби Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон бо дастгирии шарикони рушд ба муассисаҳои таҳсилоти ибтидоӣ ва миёнаи касбии мамлакат озмоишгоҳи муосири омӯзишӣ аз фанни физика тақдим гардид.

Тавре ба АМИТ «Ховар» аз Кумита оид ба таҳсилоти ибтидоӣ ва миёнаи касбӣ хабар доданд, ин иқдом дар заминаи татбиқи барномаҳои давлатӣ барои баланд бардоштани сифати таҳсилот, рушди тафаккури техникӣ ва омодасозии мутахассисони рақобатпазир амалӣ гардида, ба беҳтар намудани шароити омӯзиш ва ҷорӣ намудани усулҳои нави таълим мусоидат менамояд.

Озмоишгоҳи муосири фанни физика бо таҷҳизоти нави таълимӣ, асбобҳои озмоишӣ ва воситаҳои техникии мутобиқ ба талаботи замони муосир таъмин шудааст. Ин имконият фароҳам меорад, ки хонандагон ва донишҷӯён донишҳои назариявии худро дар амал татбиқ намуда, малакаҳои таҳлилӣ, таҷрибавӣ ва ихтироъкориро тақвият бахшанд.

Роҳбарони муассисаҳои таълимӣ иброз доштанд, ки рушди илмҳои дақиқ, бахусус фанни физика, яке аз самтҳои афзалиятноки сиёсати давлату Ҳукумати ҷумҳурӣ ба ҳисоб рафта, барои ташаккули ҷаҳонбинии илмӣ ва омодасозии кадрҳои баландихтисоси техникӣ нақши муҳим дорад. Аз ин рӯ, муҷаҳҳазгардонии муассисаҳои таҳсилоти касбӣ бо озмоишгоҳҳои муосир барои баланд бардоштани сифати таълим ва мутобиқ намудани муҳити омӯзиш ба талаботи бозори меҳнат аҳамияти махсус дорад.

Истифодаи чунин озмоишгоҳҳо ба омӯзгорон имкон медиҳад, ки раванди таълимро бештар амалӣ ва ҷолиб ба роҳ монанд. Ҳамзамон донишҷӯён метавонанд тавассути гузаронидани таҷрибаҳои илмӣ ва омӯзиши равандҳои физикӣ донишу малакаҳои касбии худро такмил диҳанд.

Дар оянда таъсис ва дастрас намудани чунин озмоишгоҳҳои муосир аз дигар фанҳои таълимӣ низ ба муассисаҳои таҳсилоти ибтидоӣ ва миёнаи касбии мамлакат дар назар дошта шудааст.

АКС: Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон