Шералӣ Кабир иқтидори саноатии Тоҷикистонро дар Муколамаи «C5+1» дар Остона муаррифӣ намуд

ДУШАНБЕ, 11.06.2026 /АМИТ «Ховар»/. Иқтидори саноатии Тоҷикистон барои сармоягузорон ва шарикони байналмилалӣ дар Муколамаи «C5+1» оид ба масоили канданиҳои фоиданоки муҳими стратегӣ, ки дар шаҳри Остонаи Қазоқистон баргузор шуд, муаррифӣ гардид, хабар медиҳад АМИТ «Ховар» бо истинод ба Вазорати саноат ва технологиҳои нави Ҷумҳурии Тоҷикистон.

Вазири саноат ва технологияҳои нави Ҷумҳурии Тоҷикистон Шералӣ Кабир дар Муколамаи «C5+1» оид ба масоили канданиҳои фоиданоки муҳими стратегӣ дар Остона оид ба иқтидори сармоягузорӣ ва саноатии мамлакат дар самтҳои энергияи «сабз», истихроҷи металлҳои нодирзаминӣ ва зеҳни сунъӣ сухан намуд.

Шералӣ Кабир гуфт, ки ки Муколамаи «C5+1» оид ба масоили канданиҳои фоиданоки муҳими стратегӣ имкониятҳои васеъро барои барқарор намудани муносибатҳои шарикӣ ва рушди соҳаи канданиҳои фоиданоки муҳими стратегӣ фароҳам меорад.

«Канданиҳои фоиданоки муҳими стратегӣ ба яке аз захираҳои калидӣ барои иқтисоди ҷаҳонӣ ва рушди технологӣ табдил меёбанд. Тоҷикистон омода аст, ки якҷоя бо ширкатҳои пешбари байналмилалӣ коркарди металлҳои нодирзаминиро ба роҳ монад. Мо на танҳо ба истихроҷи ашёи хом, балки ба ташкили истеҳсолоти муштарак, ҷорӣ намудани технологияҳои нав, омода намудани мутахассисон ва рушди ҳамкории илмӣ низ ҳавасманд мебошем»,-афзуд вазир.

Аз рӯи натиҷаҳои Муколамаи «C5+1» ва мулоқотҳо, тарафҳо таваҷҷуҳи худро ба рушди ҳамкории бисёрҷонибаи мутақобила ва амалӣ намудани лоиҳаҳои муштараки саноатию инфрасохторӣ тасдиқ намуданд.

АКС: Вазорати саноат ва технологияҳои нави Ҷумҳурии Тоҷикистон