Ҳайати дастаи мунтахаби Тоҷикистон барои бозиҳои дӯстона бо дастаҳои Озарбойҷон, Фаластин ва Чин муайян гардид

ДУШАНБЕ, 18.09.2026 /АМИТ «Ховар»/. Ситоди мураббиёни дастаи  мунтахаби Тоҷикистон оид ба футбол таҳти роҳбарии Игор Ангеловский ҳайати дастаро барои бозиҳои дӯстонаи моҳҳои сентябр ва октябр эълон кард.

Тавре ба АМИТ «Ховар» аз Федератсияи футболи Тоҷикистон хабар доданд, ба ҳайати дастаи мунтахаби Тоҷикистон 28 бозигар – 3 дарвозабон, 10 ҳимоятгар, 10 нимҳимоятгар ва 5 ҳамлагар дохил шудаанд.

Дар рӯзҳои ФИФА-и моҳҳои сентябр ва октябр дастаи мунтахаби Тоҷикистон се бозии дӯстона баргузор мекунад. 23 сентябр дастаи мунтахаби мо дар варзишгоҳи «Palms Sports Arena»-и шаҳри Боку бо дастаи мунтахаби Озарбойҷон вомехӯрад.

Пас аз ин дастаи мунтахаби Тоҷикистон ба шаҳри Чунтсини Чин сафар карда, онҷо ду бозии дигари дӯстона баргузор менамояд. 28 сентябр шогирдони Игор Ангеловский бо дастаи мунтахаби Фаластин ва 6 октябр бо тими миллии Чин бозӣ мекунанд.

Дастаи мунтахаби Тоҷикистон омодагиро ба бозиҳои дарпешистода имрӯз, 18 сентябр дар Маркази техникии Федератсияи футболи Тоҷикистон, воқеъ дар ноҳияи Варзоб оғоз мекунад.

АКС: Федератсияи футболи Тоҷикистон