Дар Токио 35-солагии Истиқлоли давлатии Ҷумҳурии Тоҷикистонро таҷлил намуданд

ДУШАНБЕ, 10.09.2026 /АМИТ «Ховар»/. Дар шаҳри Токио бо ташаббуси Сафорати Ҷумҳурии Тоҷикистон дар Ҷопон бахшида ба 35-солагии Истиқлоли давлатии Ҷумҳурии Тоҷикистон чорабинии тантанавӣ баргузор гардид.

Тавре ба АМИТ «Ховар» аз Сафорати Ҷумҳурии Тоҷикистон дар Ҷопон хабар доданд, дар чорабинӣ намояндагони расмии Ҳукумати Ҷопон, вакилони Парлумон, роҳбарони намояндагиҳои дипломатӣ, намояндагони доираҳои сиёсӣ, иқтисодӣ, тиҷоратӣ ва фарҳангии Ҷопон, инчунин ҳамватанони муқими Ҷопон иштирок намуданд.

Маросим бо иҷрои сурудҳои миллии Ҷумҳурии Тоҷикистон ва Ҷопон аз ҷониби хонандагони мактаби Согои Музофоти Канагава (Kanagawa Prefectural Kanagawa Sogo High School) оғоз гардид.

Сафири Ҷумҳурии Тоҷикистон дар Ҷопон Фарҳод Салим оид ба дастовардҳои назарраси Ҳукумати Ҷумҳурии Тоҷикистон таҳти роҳбарии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар соҳаҳои сиёсӣ, иҷтимоию иқтисодӣ ва фарҳангӣ ёдовар шуд. Таъкид гардид, ки давоми 35 соли Истиқлоли давлатии Тоҷикистон дар таҳкими сулҳу субот ва ваҳдати миллӣ, рушди иқтисодию иҷтимоӣ, таҳкими давлатдорӣ ва баланд бардоштани мақоми байналмилалии кишвар ба дастовардҳои назаррас ноил гардидааст.

Дар идомаи чорабинӣ муовини парлумонии вазири корҳои хориҷии Ҷопон Ониши Ёҳей аз номи Ҳукумати Ҷопон мардуми Тоҷикистонро ба муносибати 35-солагии Истиқлоли давлатӣ самимона табрик намуда, рушди муносибатҳои Тоҷикистону Ҷопонро дар соҳаҳои сиёсӣ, ҳамкории иқтисодӣ ва рушди захираҳои инсонӣ мусбат арзёбӣ кард.

АКС: Сафорати Ҷумҳурии Тоҷикистон дар Ҷопон