Дар вилояти Суғд лоиҳаҳои бузург дар соҳаи роҳу нақлиёт амалӣ гардиданд

ДУШАНБЕ, 24.09.2026 /АМИТ «Ховар»/. 23 сентябр Президенти Ҷумҳурии Тоҷикистон муҳтарам Эмомалӣ Раҳмон дар шаҳри Хуҷанд дар чорабинии тантанавӣ ба ифтихори ҷашни 35-солагии Истиқлоли давлатӣ иштирок ва суханронӣ намуданд.

Сарвари давлат иброз доштанд, ки бо амалӣ гардидани лоиҳаҳои бузург дар соҳаи роҳу нақлиёт – бунёди нақбҳои ҳаётан муҳими «Истиқлол» ва «Шаҳристон», таҷдиди шоҳроҳҳои Душанбе – Чаноқ ва Айнӣ – Панҷакент имрӯз робитаи шабонарӯзӣ ва бехатари сокинони вилоят бо тамоми гӯшаву канори ҷумҳурӣ ва давлатҳои хориҷӣ таъмин гардидааст.

Муҳтарам Эмомалӣ Раҳмон ёдовар шуданд, ки сокинони вилоят хуб дар ёд доранд, ки давоми даҳсолаҳои гузашта рафтуомад ба пойтахти мамлакат ва дигар минтақаҳои он тавассути роҳу ағбаҳои душворгузар бисёр мушкил ва дар фаслҳои тирамоҳу зимистон ғайриимкон буд. Дар давраи омодагӣ ба ҷашни истиқлоли миллиамон дар қатори ободониву бунёдкориҳои зиёди бахши давлатӣ аз ҷониби соҳибкорон ва аҳолии вилоят ҳазорҳо километр роҳҳои маҳаллӣ таъмиру навсозӣ карда шуданд.

Пешвои миллат ҳамчунин таъкид намуданд, ки дар вилоят ҳазорон иншооти иҷтимоӣ–муассисаҳои таълимиву тандурустӣ, марказҳои хизматрасонӣ ва коргоҳу корхонаҳои истеҳсолӣ бунёд ва ба истифода дода шуда, дар онҳо даҳҳо ҳазор ҷойи кор муҳайё гардидаанд.

Таъмин гардидани тараққиёти соҳаҳои саноати сабук, маҷмааи сӯзишворию энергетикӣ, истихроҷу коркарди маъдан, металлургия ва истеҳсоли масолеҳи сохтмон дар вилояти Суғд ҳоло ба рушди устувори иқтисоди миллӣ мусоидат мекунад.

АКС: Хадамоти матбуоти Президенти Ҷумҳурии Тоҷикистон/ АМИТ «Ховар»