НАМОЯНДАИ СААД ДАР МУЛОҚОТИ САРОНИ ДАВЛАТҲОИ АЪЗОИ СҲШ ИШТИРОК МЕКУНАД

Маскав, 28 август. (АМИТ «Ховар», Ҳалима Хушқадамова).- Муовини Муншии умумии Созмони аҳдномаи амнияти дастаҷамъӣ Тӯхтасун Бузубоев дар мулоқоти сарони давлатҳои аъзои Созмони ҳамкории Шанхай дар Душанбе иштирок дорад. Вай қабл аз парвоз ба пойтахти Тоҷикистон зимни сӯҳбат бо мухбири АМИТ «Ховар» зикр кард, ки ҳамкории СААД ва СҲШ муттасил густариш меёбад. Моҳи октябри соли гузашта созишномаи ҳамкории котиботи СААД ва СҲШ имзо шуда буд. Мувофиқи он котиботи ҳар ду созмон маълумоти заруриро дастраси ҳамдигар гардонда, машваратҳо гузаронида, бо мақсади рушди ҳамкорӣ дар соҳаи таъмини амнияти минтақавӣ ва байналхалқӣ барномаҳо тартиб дода ва чораҳои зарурӣ меандешанд. Т. Бузубоев изҳор намуд, ки намояндагони Чин, Эрон ва Покистон чандин сол боз дар амалиёти зидди маводи нашъадори – «Канал» иштирок менамоянд.