ҚОЧОҚЧИИ ЧАРХҲОИ МОШИН БА ДАСТ АФТОД

Душанбе, 23 сентябр. (АМИТ «Ховар», Мавҷуда Давлатзода).- Кормандони Раёсати минтақавии гумруки вилояти Суғд ҳангоми гузаронидани як амалиёти фаврӣ дар роҳи мошингарди Конибодом — Хуҷанд дар наздикии ҷамоати Қистақӯзи вилояти Суғд мошини боркаши «ЗИЛ-133» (рақами давлатиаш С56-19 02 РТ), ки онро ронанда Абдураҳмон Азимов идора мекард, боздошт намуданд. Аз маркази матбуоти Хадамоти гумруки назди Ҳукумати Ҷумҳурии Тоҷикистон ба мухбири АМИТ «Ховар» хабар доданд, ки дар бордони мошин 148 адад чархи резинии мошинҳои гуногун мавҷуд будааст. Ҳамаи ин чархҳо бе ягон ҳуҷҷатҳои гумрукӣ ба шаҳрванд Сафармад Ятимов тааллуқ дорад. Номбурда иқрор шуд, ки 148 адад чархи резинии мошинро аз шахси номаълум дар деҳаи наздисарҳадии Аркаи Ҷумҳурии Қирғизистон харида ба ҳудуди Ҷумҳурии Тоҷикистон бидуни назорати гумрукӣ ба таври қочоқ ворид намудааст. Оид ба ин воқеа тибқи моддаи 198-и Кодекси Ҷумҳурии Тоҷикистон дар бораи ҳуқуқвайронкунии маъмурӣ протокол тартиб дода шуда, тифтиш давом дорад.