ЭМОМАЛӢ РАҲМОН ДАР ДИЁРИ РӮДАКӢ

Панҷакент, 10 сентябр. (АМИТ «Ховар», Бекназари Абӯбакр).- Президенти Ҷумҳурии Тоҷикистон Эмомалӣ Раҳмон имрӯз барои иштирок дар ҷамъомадҳои ботантана ба муносибати 1150 – солагии асосгузори адабиёти классикии тоҷику форс Абӯабдулло Рӯдакӣ ба Панҷакент омад. Вай зимни сафар мақбараи Одамушшуароро дар деҳаи Панҷрӯд зиёрат карда, дар гирдиҳамоии серодам ба шарафи ҷашни устод Рӯдакӣ ва ифтитоҳи мақбараи ӯ баъди тармиму таҷдиди кӯлли ширкат варзид. Президенти ҷумҳурӣ зимни суханронӣ аз ҷумла гуфт: « Устод Рӯдакӣ ҳамчун қаламкаши пуртаҷриба назми классики тоҷику форсро таҳкурсии забони модарии мо — забони тоҷикӣ қарор дод. Маҳз барои ҳамин мову шумо имсол дар радифи 1150 – солагии Абӯабдуло Рӯдакӣ Соли забони тоҷикиро таҷлил менамоем. Ба ақидаи ман, ин шаҳодати равшани бузургию шаҳомати забони тоҷикӣ, назми Рӯдакӣ ва робитаи ногусастании онҳо мебошад» . Сардори давлат зикр кард, ки мақбараи Рӯдакӣ яке аз ёдгориҳои муҳимтарини таърихи гузаштаи халқи тоҷик ба шумор меравад. Мақбара имрӯз баъди тармими куллӣ бо шукӯҳу шаҳомати тоза қомат афрохт. Мақбараи нахустини устод соли 1958 сохта шуда буд. Онро соли 1999 ба муносибати 1100- солагии давлати Сомониён тармим карда буданд. Вале мақбара ба талаботи замон ва анъанаҳои меъмории ниёгони мо мувофиқат намекард. Бинобар ин Ҳукумати Тоҷикистон қарор қабул намуд, ки оромгоҳи шоир мувофиқи анъанаҳои меъмории асри даҳуми даврони мо ва талаботи давраи истиқлолияту давлатдории тоҷикон аз нав сохта шавад.