ҶАМЪИЯТИ ҲИЛОЛИ АҲМАР 81 СОЛА ШУД

        Душанбе,  24  декабр. (АМИТ «Ховар»,  Фарангис  Раҳимова). –  23  декабр  ба  таъсиси Ҷамъияти  Ҳилоли  Аҳмари  Тоҷмикистон  81 сол  пур  шуд. Ҷамъияти  мазкур айни  ҳол  бештар  аз  6  ҳазор  аъзо ва  зиёда  аз  10  ҳазор  ёрдамчиёни  ихтиёрӣ  дорад. Ҷамъияти  Ҳилоли  Аҳмар  ягона  ташкилотест, ки   дар  саросари  мамлакат  69  филиал ва  қариб  1000  ташкилоти  ибтидоӣ  дорад.  Ҳамаи  онҳо   ба   мӯҳтоҷон  кӯмаки  иҷтимоӣ  мерасонанд.  Саркотиби  ҷамъият   Зафар Муҳаббатов  ба  мухбири  АМИТ «Ховар»  гуфт, ки  ҷамъияти  мазкур  ҳамчун  ҷузъи  таркибии Ҷунбиши  байналмилалии  Салиби  Сурх  ва Ҳилоли  Аҳмар  дар    давоми  фаъолияташ  ба  мӯҳтоҷон  кӯмаки   зарурӣ  расондааст. Кормандони  ҷамъият  аҳолиро  бо  оби тоза таъмин  намуда,  ба  беморон  кӯмаки  таъҷилии  тиббӣ  расонда,   мушкилоти   одамонро  дар  мавриди  рух  додани  фалокатҳои  гуногун  осонтар  сохта,   барои  пешгирии  бемориҳои  хавфнок  тадбирҳо  андешида,   беморонро  бо  дору  таъмин  карда,  ба  одамони  солхӯрда  ва бекас   кӯмаки  зарурӣ мерасонанд.