ДАР ҶИЛЛИКӮЛ МАРКАЗИ КИШОВАРЗӢ КУШОДА МЕШАВАД

          Қӯрғонтеппа, 3  декабр. (АМИТ «Ховар»,   Мурод  Сотиев). – Бо  кӯмаки  молиявии  сафоратхонаи  Ҷопон  дар  Тоҷикистон  дар  ноҳияи  Ҷилликӯл  маркази   омӯзиши  донишҳои  кишоварзӣ  кушода  мешавад. Мудири  шӯъбаи  иқтисодии   мақомоти иҷроияи  ҳокимияти  давлатии  ноҳия  Салимҷон  Авазов   ба  мухбири  АМИТ «Ховар»  гуфт, ки   марказ   ба  рушди  соҳаи  кишоварзӣ  бо  роҳи  гузаронидани  ҷамъомадҳои  гуногун,  аз ҷумла,  семинарҳо  мусоидат   хоҳад  кард. Кормандони  соҳа  ба  ин васила   донишу  таҷрибаи  худро  дар  бобати  парвариши  зироатҳои  серҳосил  ғанитар  мегардонанд. Ба  фаъолияти  марказ  олимону  мутахассисон  ҷалб  карда  мешаванд. Ҳамчунин   барои  гузаронидани  таҷриба қитъаи  замин  ҷудо карда  хоҳад  шуд. С.Авазов  дар  фарҷоми  сӯҳбат  зикр  намуд, ки  дар  назди  марказ  озмоишгоҳи  махсус  низ  кушода  мешавад.