ФАСЛИ БАҲОР ДАР МАМЛАКАТ 750 ҲАЗОР БЕХ НИҲОЛ ШИНОНДА МЕШАВАД

     Душанбе, 3 декабр. (АМИТ «Ховар», Фарангис Раҳимова).- Корхонаи воҳиди давлатии  «Тоҷикниҳолпарвар» — и  Вазорати кишоварзии ҷумҳурӣ бо қувваю маблағи худ 745,2 ҳазор бех ниҳоли дарахтони гуногун парвариш мекунад, ки фасли баҳор минтақаҳои гуногуни мамлакат кучат карда мешаванд. Аз ин ҷумла 449 ҳазор бех ниҳоли дарахтони мевадиҳанда, бештар аз 136 ҳазор бех  ток, 59,2 ҳазор бех тут ва 100,2 ҳазор бех ниҳоли дарахтони ороишӣ мебошад. Аз Вазорати кишоварзӣ ба мухбири АМИТ  «Ховар»  хабар доданд, ки ҳоло дар 13 ноҳияи мамлакат хоҷагиҳои ниҳолпарварӣ фаъолият доранд.                Корхонаи воҳиди давлатии «Тоҷикниҳолпарвар» ҳар сол то 1,7 миллион бех ниҳол тайёр мекунад. Ҳамаи онҳо ба талаботи  стандарти давлатӣ мувофиқ буда, ба шароити маҳалҳои мамлакат мутобиқ гардонда шудаанд. Бояд гуфт, ки соҳаи ниҳолпарварӣ ба иқтисодиёти ҷумҳурӣ фоидаи калон мерасонад. Бинобар ин барои пешрафти он тадбирҳои самарабахш андешида мешаванд.