ФОНДИ САРМОЯГУЗОРИИ ТОҶИКИСТОНУ ҚАЗОҚИСТОН БА ФАЪОЛИЯТ ШУРӮЪ МЕКУНАД

       Душанбе, 16  декабр.(АМИТ «Ховар»  — «Казахстан  сегодня»). –  Сафири  кабири  Қазоқистон  дар  Тоҷикистон Абӯтолиб  Аҳмадов зимни  сӯҳбат  бо  хабарнигорон  зикр  кард, ки  Фонди  муштараки  сармоягузории Тоҷикистону  Қазоқистон аз  1  январи соли  2009 ба  фаъолият  шурӯъ  мекунад.         Ба  қавли  сафир,  Қазоқистон  бо  Тоҷикистон дар  ҳамаи  соҳаҳои  иқтисодиёт ва  пеш  аз  ҳама  дар  соҳаи  гидроэнергетика,  хусусан  сохтмони  нерӯгоҳҳои  барқии  хурду  миёна  ҳамкорӣ  хоҳад  кард,  гуфт  сафир. Вай  ёдовар  шуд, ки  Фонди  муштараки  сармоягузории  Тоҷикистону  Қазоқистон  тибқи  паймони  президентҳои  ҳар  ду  мамлакат  бунёд  карда  шудааст. Маблағи  сармояи  ибтидоии  он  сад  миллион  доллари  ИМА  мебошад. Ҳадафи  ташкили  бунёд  гузоштани  сармоя  барои  пешрафти  иқтисодиёти  Тоҷикистон  мебошад.              Дипломат  дар  бораи  коргарони  муҳоҷири тоҷик  сухан  ронда,  афзуд, ки Қазоқистон  ба  истифодаи онҳо  дар  сохтмони  иншоотҳои  калон,  аз  ҷумла,  газопроводҳо ва  роҳҳои  мошингард  манфиатдор аст.