Р.ОЛИМОВ: «ҲАР СУБҲ ЧИНРО БАРОИ ХУД БА ТАРЗИ НАВ КАШФ МЕНАМОЯМ»

         Душанбе,  23  декабр. (АМИТ «Ховар», Наргис  Бояхмедова). – Сафири  Тоҷикистон   дар  Ҷумҳурии  Мардумии Чин Рашид  Олимов  дар  зиёфати  солинавии  шӯъбаи  ахбори хориҷии  рӯзномаи  «Женмин  Жибао»  ва сайти  интернетии «Женминван» ширкат  варзид. Вай   кормандони  ин  нашрияро ба муносибати  фаро  расидани иди Соли нав  табрик  намуда,   зикр  кард, ки «Ҳар  субҳ кишвари  Чинро  барои  худ  ба  таври  дигар  кашф  менамояд».  Ба  туфайли маҳорати  калони  касбӣ ва таҷрибаи  мухбирону  суратгирон   ва  рассомони  рӯзнома дар пеши  назари  хонанда  манзараҳои рангоранги  ҳаёти   пурҷӯши  хӯрӯши   мардуми  мамлакат  ҷилвагар  мешавад. Сафир  зикр  намуд, ки  мардуми  Чин  30  сол  боз  ҷаҳониёнро  бо  ислоҳоти  ҷасурона  ва  самимияти  худ  ба  ҳайрат меандозад. Чин  дар  соли гузашта ба  комёбиҳои нав ба нав  ноил  гардид. Тантанаи  Бозиҳои  олимпӣ ва  мардонавор  бартараф  сохтани оқибати  зилзилаи  харобиовар   дар  вилояти  Сичуан  иродаи  қавӣ  ва  рӯҳияи  шикастнопазиру  ваҳдати  халқи  Чинро  бори дигар  ба  мардуми  ҷаҳон нишон  доданд.  Мамлакатҳои  ҷаҳон  Чинро дар  бобати  бартараф  сохтани  ин фоҷиа  ҳамаҷониба дастгирӣ  намуданд. Тоҷикистон  ҳам  мисли  бисёр  мамлакатҳои  ҷаҳон бо иштироки  намояндагони  худ   Бозиҳои  олимпиро  дастгирӣ  намуда,  ба мардуми  офатзадаи вилояти  Сичуан то ҳадди  имкон   кӯмаки  башардӯстона  расонд,  гуфт  Рашид  Олимов.