ВАЗИРИ НАҚЛИЁТ ВА КОММУНИКАТСИЯИ ТОҶИКИСТОН БА ОЗАРБОЙҶОН МЕРАВАД

        Душанбе, 3 декабр. (АМИТ «Ховар», Мавзуна Бойева).- Тавре аз Вазорати нақлиёт ва коммуникатсияи Ҷумҳурии Тоҷикистон ба мухбири АМИТ «Ховар» иттилоъ доданд, аз 3-юм то 5-уми декабри соли ҷорӣ дар шаҳри Бокуи Ҷумҳурии Озарбойҷон бо иштироки вазирони нақлиёти давлатҳои аъзои ТРАСЕКА конфронс баргузор мегардад. Конфронс ба 10-солагии ташкилёбии ин созмон бахшида шуда, дар кори он баррасии Созишномаи асосии бисёрҷониба (ОМС), инчунин масъалаи таҳкими минбаъдаи сохтори ТРАСЕКА дар раванди имкониятҳои нав ба нақша гирифта шудааст.       Бо назардошти муҳимияти масъалаҳои баррасишаванда, дар чорабинии мазкур вазири нақлиёт ва коммуникатсияи Ҷумҳурии Тоҷикистон Абдураҳим Ашӯр ва ноиби аввали раиси Ассотсиатсияи барномаҳои атомобилии байналмилалии Ҷумҳурии Тоҷикистон — «АББАТ» Боймурод Эшонов иштирок мекунанд.