ВАЗИРИ КИШОВАРЗӢ БА ОЯНДА НЕКБИН АСТ

                    Душанбе, 27 январ. (АМИТ «Ховар», Лаззат Диловарзод).- Вазифаи асосии кишоварзон ин таъмини амнияти озуқавории мамлакат ва истехсоли ҳарчӣ бештари маҳсулот мувофиқи меъёрҳои муайянгардида мебошад,-иброз дошт вазири кишоварзӣ Қосим Қосимов дар ҷаласаи ҷамъбастии солонаи соҳаи мазкур ба хабарнигорони дохилу хориҷи кишвар.                     Бо мақсади дастгирии соҳаи кишоварзӣ ва рушди минбаъдаи он соли 2008 аз буҷети ҷумҳурӣ бо назардошти рушди соҳаҳои дигари кишоварзӣ ва нақшаи тасдиқшудаи хароҷот 32 миллиону 88 ҳазор сомонӣ ҷудо гардид. Аз маблағи ҷудогардида то охири моҳи декабри соли 2008 31 миллиону 307 ҳазор сомонӣ хароҷот карда шудааст. Аз ҳисоби ин маблағ танҳо барои хариди техникаи таъиноти кишоварзӣ 8 миллион сомонӣ ҷудо гардид, ки бо ин маблағ беш аз 100 трактори шудгоркунанда харидорӣ гардид.                   Камбудиҳои соҳаи кишоварзӣ зиёд аст, аммо онро бо ҷаҳду талоши мардуми заҳматкаш бартараф хоҳем кард,-мегӯяд бо боварӣ вазири кишоварзӣ Қосим Қосимов.