КИТОБХОНАИ ИЛМИИ ДОНИШГОҲ САЗОВОРИ СЕРТИФИКАТИ ЗАРРИН ГАРДИД

                    Душанбе, 4 феврал. АМИТ «Ховар», Таҳмина Ғоибназарова ). — Китобхонаи илмии Донишгоҳи миллии Тоҷикистон дар озмуни китобхонаҳои илмии мактабҳои олии мамлакатҳои ИДМ ширкат варзида, ғолиб омад ва сазовори сертификати заррин гардид. Озмуни мазкур моҳи декабри соли гузашта гузаронида шуд. Шартҳои он ба масъалаҳои гуногуни фаъолияти китобхона, аз ҷумла, миқдори китобҳо дар фонди китобхона, шароити нигоҳ доштани китобҳои дарсӣ, тартибу сифат ва миқдори истифодаи онҳо, мавҷудияти китобҳои илмӣ ва теъдоди хонандагонро дар бар мегирифтанд.                    Директори китобхонаи донишгоҳ Зайниддин Мухторов ба мухбири АМИТ «Ховар» гуфт, ки ба туфайли ғолиб омадани он дар озмун ба фонди китобхона 3 ҳазор нусха китобҳои илмию таълимӣ тӯҳфа карда мешавад. Инчунин, гурӯҳи калони кормандони он барои омӯхтани таҷриба ба Маскав мераванд.