ҶИЛДИ 8-УМИ КИТОБИ ПРЕЗИДЕНТИ КИШВАР БО СЕ ЗАБОН АЗ ЧОП БАРОМАД

               Душанбе, 3 апрел.(АМИТ «Ховар», Лутфия Эшонкулова).- Ҷамъияти саҳҳомии шакли кушоди "Матбуот"-и Вазорати фарҳанги ҶТ ҷилди 8-уми китоби Президенти кишвар Эмомалӣ Раҳмонро бо номи "Истиқлолияти Тоҷикистон ва эҳёи миллат" бо теъдоди 2000 нусха аз чоп баровард.                 Тавре ба мухбири АМИТ «Ховар» дар Вазорати фарҳанг хабар доданд, китоби мазкур бо забонҳои форсӣ ва англисӣ низ ба табъ расид. Дар он баромадҳои Сарвари давлат дар конфронсҳои байналмилалӣ ва суханрониҳои ӯ бахшида ба ҷашнҳои анъанавии кишвар гирд оварда шудаанд.                Ҳамчунин, нашриёти «Матбуот» бо теъдоди 1000 нусха маҷмӯаи мақолаҳои Академияи илмҳои педагогии Вазорати маорифи ҶТ бо номи "Анталогия педагогической мысли таджикского народа" ба табъ расонид. Дар китоб намунаи эҷодиёти маорифпарварон тоҷик аз давраҳои қадим то Инқилоби октябр ҷамъ оварда шудааст. Китоби мазкур барои мутахассисони соҳаи педагогика ва кормандони соҳаи маориф ва фарҳанг тавсия карда мешавад.                 Нашриёти номбурда ояндаи наздик боз панҷ китоби дигар, аз ҷумла "Операи Рустам ва Сӯҳроб"-и Т. Сатторов, "Операи Шерак"-и С. Ҳамроев, "Операи Коваи оҳангар" ва "Операи шӯриши Восеъ"-и С. Баласанян ва рубоиёти Хайёмро чоп хоҳад кард.                 То имрӯз нашриёти "Матбуот" ба маблағи 260 ҳазор сомонӣ адабиёти гуногунро аз чоп баровард, ки нисбати ҳамин давраи соли гузашта се маротиба зиёд мебошад.