АРЗИШҲОИ ИСЛОМӢ АЗ ДИДГОҲИ НАВИНИ МЕТОДОЛОГӢ

                 Душанбе, 17 апрел.(АМИТ «Ховар», Марзия Саидова).-Нашриёти «Ирфон» китоберо бо номи «Педагогикаи ислом» зери назари доктори илмҳои педагогӣ, профессор Хайруллоҳ Афзалов ба тозагӣ аз чоп баровард.                Муаллифи китоби мазкур профессор Сафар Сулаймонӣ буда, кӯшиш намудааст, ки масъалаи педагокикаи ислом ва мақоми онро дар бунёди илмҳои тарбиявӣ дар мисоли Эрон дар ин китоб баррасӣ намояд.Дар китоб таҳлилу баррасии арзишҳои исломӣ аз дидгоҳи навини методологӣ зикр шудааст ва имкон медиҳад, ки дастовардҳои назарияи таълиму тарбия ба таври мушаххас арзёбӣ гардад.                Китоб бо ташаббуси Вазорати маорифи ҷумҳурӣ, Академия ва Пажӯҳишгоҳи илмҳои педагогии Тоҷикистон ва Ройзании Сафорати Эрон дар Душанбе бо теъдоди 500 адад бо забони тоҷикӣ нашр шудааст. Докторҳои илмҳои педагогӣ, фалсафа ва филологӣ Маҳмадуллоҳ Лутфуллоев, Каримҷон Қодиров ва Умриниссо Казакова муқарризони китобанд.                Китоб барои доираи васеи муҳаққиқону пажӯҳишгарон, муаллимон, донишмандону мутахассисони соҳаи педагогика тавсия шудааст.