БӮҲРОНИ МОЛИЯВӢ БА ИҶРО НАГАРДИДАНИ БУҶЕТ ТАЪСИР РАСОНД

                     Душанбе, 15 апрел. (АМИТ «Ховар», Бекназари Абӯбакр). — Дар семоҳаи якум иҷроиши нақшаи буҷети суғуртаи иҷтимоӣ ва нафақа ба андозаи 92,6 фоиз таъмин гардида, нисбат ба нақшаи пешбинишуда 10,8 миллион сомонӣ кам ва бо вуҷуди ин, нисбат ба ҳамин давраи соли гузашта 42,7 миллион сомонӣ зиёд мебошад.                     Дар Вазорати молияи ҷумҳурӣ ба мухбири АМИТ «Ховар» гуфтанд, ки аз ҳисоби буҷети ҷумҳуриявӣ ба буҷети суғуртаи иҷтимоӣ ва нафақа 3 миллион сомонӣ ё 100 фоиз маблағҳои мақсаднок барои пардохти нафақа, маблағгузорӣ карда шуд.                     Нақшаи даромадҳои буҷети ҷумҳуриявӣ ба андозаи 74,8 фоиз таъмин гардида, ба буҷет 493,0 миллион сомонӣ ворид гардид, ки ин нисбат ба нақша 166,4 миллион сомонӣ кам аст.                      Бояд қайд кард, ки дар давраи ҳисоботӣ нақшаи воридоти баъзе намуди андозҳо таъмин нагардида, аз ҳисоби ин манбаъҳои даромад ба буҷет зиёда аз 166,4 миллион сомонӣ ворид нагардид. Аз ҷумла, танҳо аз ҳисоби фурӯши алюминий тибқи нақшаи пешбинишуда 80 миллион сомонӣ ворид нагардид, ки ин бевосита таъсири бӯҳрони моливии ҷаҳонӣ мебошад.                     Хароҷоти Буҷети давлатӣ дар семоҳаи якум мувофиқ ба иҷроиши даромади он ба андозаи зиёда аз 80 фоиз таъмин гардид.Бо вуҷуди ин, дар ин давра пардохти музди меҳнат, нафақа, стипендия, ҷубронпулӣ ва кӯмакпулиҳо, хизматрасониҳои коммуналӣ дар мадди аввал маблағгузорӣ карда шуда, пурра таъмин гардиданд. Инчунин, маблағгузории иншооти афзалиятноки муҳими давлатӣ бо дарназардошти воқеияти захираҳои молиявӣ амалӣ гардиданд.