«ФЛОРА» ВА «КАРМЕН»-РО БА ТОҶИКИСТОН ОВАРДАНД

               Душанбе, 15 апрел. (АМИТ «Ховар», Лаззат Диловарзод).- Тибқи Эъломияи байни Бонки Рушди Исломӣ ва Вазорати иқтисод ва савдои Ҷумҳурии Тоҷикистон, ҳамчунин шартномаи тарафайни Вазорати кишоварзӣ ва Ҷамъияти масъулияташ маҳдуди Институти илмии истеҳсолии (ҶММ ИИИ) «Кубанзерно»-и шаҳри Краснодар дар моҳи апрели соли ҷорӣ ба миқдори 1298 тонна тухмии гандум аз Институти илмию тадқиқотии ба номи П.П. Лукяненко ба ҷумҳурӣ ворид карда шудааст.              Тухмӣ ба кооперативи истеҳсолии ба номи Латиф Муродови ноҳияи Ҳисор барои заҳролудкунӣ ва нигоҳдорӣ супорида шудааст.Дар назар аст, ки аз ин тухмӣ дар навбати аввал хоҷагиҳои тухмипарвар ва таҷрибадор бархӯрдор мешаванд.              Соли ҷорӣ ҳамчунин тибқи шартномаҳои ба имзорасидаи Ҷумҳурии Тоҷикистон ва давлати Туркия ба миқдори 300 тонна тухмии навъҳои серҳосили «Флора» ва «Кармен» ба Тоҷикистон ворид карда шудааст.