МАҚОЛАИ ПРЕЗИДЕНТИ ТОҶИКИСТОН БА ЗАБОНИ АРАБӢ ТАРҶУМА КАРДА ШУД

                      Душанбе, 2 апрел. (АМИТ «Ховар», Наргис Бояхмедова). — Дар шумораи моҳи апрел чопшудаи маҷаллаи ҳармоҳаи Академияи тадқиқотии исломии Донишгоҳи «Алазҳор» — и Ҷумҳурии Араби Миср мақолаи Президенти Ҷумҳурии Тоҷикистон Эмомалӣ Раҳмон «Имоми Аъзам ва тафаккури миллии тоҷикон» нашр шуд. Мақолаи мазкур дар маҷалла таҳти рубрикаи «Саҳифаҳои фарҳанги Тоҷикистон» пешкаши хонандагони мамлакатҳои араб гардонда шудааст. Мақоларо ба забони арабӣ олими Донишгоҳи мазкур Абдулваҳҳоби Аллуб тарҷума кардааст. Дар маҷалла ҳамчунин тарҷумаи ҳол ва акси Президенти Ҷумҳурии Тоҷикистон оварда шудааст. Дар он дар бораи саҳми Президенти Тоҷикистон дар таҳкими сулҳ, созгории миллӣ ва рушди давра ба давраи иқтисодиёти мамлакат, ташаббусҳои Эмомалӣ Раҳмон дар бораи истифодаи сарфакоронаю оқилонаи об ва ғайра нақл карда мешавад.                     Тарҷумони мақола, инчунин, аз сафари расмии Сарвари давлати Тоҷикистон ба Ҷумҳурии Араби Миср дар моҳи феврали соли 2007 ва ҷилди аввали асари сеҷилдаи ӯ «Тоҷикон дар оинаи таърих» ёдовар мешавад, ки соли 2008 дар Қоҳира ба забони арабӣ чоп шуда буд. Дар ин бора аз дафтари матбуоти вазорати корҳои хориҷӣ ба АМИТ «Ховар» хабар доданд.