МУЛОҚОТ БО ТАМОШОБИНОН

                   Душанбе, 30 апреля. (АМИТ «Ховар», Лутфия Эшонкулова).-Рӯзҳои наздик дар доираи чорабиниҳои, бахшида ба 80-солагии киностудияи «Тоҷикфилм» гурӯҳи ҳунарпешагон, аз ҷумла коргардони филми «Гушгаштапайдо» Юнус Юсуфов бо тамошобинони ноҳияи Ҳисор мулоқот хоҳанд кард. Тавре ба мухбири АМИТ «Ховар», директори киностудияи мазкур Саидҷалол Саидов хабар дод, филми «Гумгаштапайдо» ба мардуми ноҳияи Ҳисор хеле писанд омадааст ва онҳо хоҳиш намуданд, ки бо коргардони филм сӯҳбат кунанд.                  «Чунин хоҳишу дархостҳо аз тамошобинони ноҳияҳои дигар низ ба мо расиданд ва мо ният дорем, ки дар давоми сол бо тамошобинони шаҳру навоҳии дигари ҷумҳурӣ низ мулоқотҳо гузаронем».                  С. Саидов зикр намуд, ки дар вохурӣ ҳайати эҷодӣ бо тамошобинон дар бораи таҳияи филм, интихоби ҳунарпешагон ва мушкилоти ҷойдошта сӯҳбат менамоянд.                  Филми «Гумгаштапайдо»- саргузашти ғамангези духтаракест, ки модарашро аз даст додааст ва азобу машаққати зиёдро аз сар гузаронида, баъд бар асари ҷидду ҷаҳд ва азму талошҳояш ба мақсад мерасад.