«НОРАК- АНТИТЕРРОР- 2009»

                  Душанбе, 14 апрел. (АМИТ «Ховар», Лаззат Диловарзод).- Бино ба иттилои сардори маркази матбуоти Вазорати мудофиаи ҷумҳурӣ Фариддун Маҳмадалиев, аз 17 то 19-уми апрели соли ҷорӣ дар машқгоҳи Фахрободи гарнизони Хатлон машқҳои муштараки ҳарбии зиддитеррористӣ таҳти унвони «Норак-антитеррор- 2009» гузаронида мешавад.                  Бино ба иттилои ҳамин сарчашма, машқҳо дар доираи нақшаи ягона ва дар асоси Қарори Шӯрои сохтори зиддитеррористии Ташкилоти Ҳамкориҳои Шанхай (ШОС) гузаронида мешавад.                  Машқҳои муштарак дар ду марҳила баргузор мегарданд. Дар ин машқҳо гурӯҳҳои оперативӣ ва қисмҳои махсуси Қувваҳои Мусаллаҳи Тоҷикистон, Қазоқистон, Қирғизистон, Федератсияи Россия ва Ҷумҳурии Мардумии Чин ширкат варзида, аз техникаи вазнини ҷангӣ ва авиатсия истифода намуда, маҳорати ҷангии худро бар зидди ҳар гунна зӯроварӣ, аз қабили терроризм, экстремизм ва сепаратизм намоиш медиҳанд.