СЕМИНАР БАРОИ ОМӮЗГОРОНИ ТАРБИЯИ ҶИСМОНӢ

                       Душанбе, 3 апрел. (АМИТ «Ховар», Пайрав Назаров). — Дар шаҳри Хуҷанд дар доираи барномаи «Ҳаракат ва маърифати олимпӣ» барои омӯзгорони тарбияи ҷисмони ва мураббиёни Мактаби варзишии бачагону наврасон семинар баргузор гардид. Дар он намояндагони Академияи миллии олимпӣ, шӯъбаи маорифи Хуҷанд ва Иттиҳоди «Занон ва варзиш» ширкат варзиданд. Муовини раиси Академияи миллии Олимпии ҷумҳурӣ Ибод Шарифӣ ба АМИТ «Ховар» хабар дод, ки иштирокчиёни семинар бо таърихи Бозиҳои қадима ва имрӯзаи олимпӣ, рамзҳо ва принсипҳои асосии олимпӣ ва иштироки намояндагони Тоҷикистон дар ҳаракати олимпӣ шинос гардиданд.                        Семинар таҳти роҳбарии муовини раиси Академияи миллии олимпӣ Ибод Шарифӣ ва ҳамоҳангсози Иттиҳоди «Занон ва варзиш» — и Хуҷанд Манижа Қосимова гузашт. Дар он масъалаҳои беҳтар сохтани сифати машғулиятҳои тарбияи ҷисмонӣ ва варзиш дар мактабҳо, нақши омӯзгорони тарбияи ҷисмонӣ ва мураббиёни мактаби варзишии бачагону наврасон дар тарбияи варзишгарони ҷавон баррасӣ шуданд.