ҲАМКОРИИ МАМЛАКАТҲОИ ИДМ ДАР СОҲАИ ВАРЗИШ

                        Маскав, 20 май. (АМИТ «Ховар», Ҳалима Хушқадамова). — 21 май дар пойтахти Ҷумҳурии Белорусия — шаҳри Минск маҷлиси Шӯрои варзиш ва тарбияи ҷисмонии мамлакатҳои ИДМ баргузор мегардад, ки иштирокдори созишномаи ҳамкорӣ дар соҳаи варзиш ва тарбияи ҷисмонӣ мебошанд. Дар ин бора ба АМИТ «Ховар» аз дафтари матбуоти Кумитаи иҷроияи ИДМ хабар доданд.                        Иштирокчиёни маҷлис масъалаи гузаронидани мусобиқаи байналхалқии футболро барои ба даст овардани Ҷоми қаҳрамонии мамлакатҳои ИДМ ва Балтика муҳокима мекунанд. Маҷлиси мазкур хусусияти ташкилӣ дорад. Дар он раиси Шӯрои тарбияи ҷисмонӣ ва варзиши мамлакатҳои иштирокдори созишномаи ҳамкорӣ дар соҳаи варзиши ИДМ интихоб карда мешавад.                      Ёдовар мешавем, ки сарони ҳукуматҳои ИДМ соли 2007 дар Ялта созишномаи ҳамкориро дар соҳаи варзиш ва тарбияи ҷисмонӣ имзо карда буданд. Ҳуҷҷат муҳайё сохтани шароити мусоидро барои ривоҷ додани харакати олимпӣ, дар қаламрави ИДМ паҳн намудан ва дастраси ҳамдигар гардондани иттилоот дар бораи рӯйдодҳои варзишӣ, гузаронидани мусобиқаҳои оммавӣ дар байни аҳолӣ, мустаҳкам кардани заминаи моддии тадбирҳои варзишӣ, тайёрӣ ба Бозиҳои олимпӣ, мусобиқаҳои байналхалқӣ ва ғайраро пешбинӣ менамояд.