ҶАВОНОН КАСБ МЕОМӮЗАНД

                          Бадахшон, 25 май. (АМИТ «Ховар», Лутфишо Додо).- Дар ВМКБ ба хотири паст кардани шиддати бекорӣ ба касбомӯзии ҷавонону наврасон эътибори ҷиддӣ медиҳанд. Чунончи, дар мактаби маълумоти касбии Донишгоҳи Осиёи Миёна, ки маркази вилоят ҷойгир аст, барои хатмкунандагони мактабҳои миёнаи шаҳри Хоруғ маҳфили дарҳои кушод доир гардид. Некрӯз Сарбаландов, як тан коршиноси Донишгоҳ мурод аз тавлиди маҳфилро дар ошно намудани хатмкунандагони макотиби миёна, ки баъди чанде ба ҳаёти мустақилона қадам мегузоранд, бо барномаҳои донишгоҳ арзёбӣ намуд. Мавсуф иброз дошт, ки аз соли 2006 то имрӯз беш аз 3000 нафар ҷавонон бо ихтисосҳои гуногун онро хатм намуданд. Онҳо на танҳо дар вилоят, ҷумҳурӣ, балки берун аз он низ босамар кор мекунанд. Ҷавонон дар ин ҷо касбҳои челонгарӣ, компютер, харротӣ, деворгарӣ, ҷелонгарӣ барқӣ, омӯзиши забонҳои русию англисӣ ва ғайраро аз худ мекунанд. Ин курсҳо дар чанд соли оянда низ ҷавононро касб меомӯзанд.