БЕМОРИИ A (H1N1) МАМЛАКАТҲОИ НАВРО ФАРО МЕГИРАД

                        Душанбе, 28 май. (АМИТ «Ховар», Фарангис Раҳимова). — Созмони ҷаҳонии тандурустӣ 27 май хабар дод, ки бемории A(H1N1) то имрӯз 48 мамлакати ҷаҳонро фаро гирифтааст. Дар ин мамлакатҳо 13 ҳазору 398 нафар гирифтори ин беморӣ гардид. Аз, ин ҷумла, то имрӯз 95 нафар вафот кард. Хабар дода мешавад, ки бемории мазкур дар 20 мамлакати Аврупо низ ба қайд гирифта шуд. Дар Федератсияи Русия 2 нафар ба ин беморӣ гирифтор шуд. Умуман дар мамлакатҳои Аврупо 376 нафари ба ин бемории хавфнок мубталогардида ба қайд гирифта шуд.                        Дар хабари Созмони ҷаҳонии тандурустӣ гуфта мешавад, ки дар Мексика аз 4 ҳазору 541 нафари ба ин бемории хавфнок гирифторшуда 83 нафар вафот кардааст. Дар Иёлоти Муттаҳидаи Амрико 6764 нафар ба ин беморӣ гирифтор гардид. То имрӯз 10 нафари онҳо вафот кард.                      Дар ин бора аз дафтари матбуоти СММ хабар доданд.