ДУЗДИИ СОХТАКОРОНА

                               Душанбе, 6 май. (АМИТ «Ховар», Наталя Михайлова). — Кормандони Шӯъбаи корҳои дохилии ноҳияи Рӯдакӣ ҳамроҳи ҳамкасбонашон аз Раёсати мубориза ба муқобили ҷинояти муташаккилонаи Вазорати корҳои дохилии ҷумҳурӣ дар натиҷаи тадбирҳои фаврӣ ҷиноятеро фош карданд, ки 27 апрели соли равон содир карда шуд. Бояд гуфт, ки натиҷаҳои тафтишот ғайричашмдошт буданд.                Ҳамон рӯз соати 23 — ю 30 дақиқа ба Шӯъбаи корҳои дохилии ноҳияи Рӯдакӣ телефонӣ хабар доданд, ки шахсони номаълум мағозаи «Вохӯрӣ» — ро дар ҳудуди колхози «Россия» ғорат кардаанд. Аз рӯи хабари расида, чор шахси номаълум ба дӯкони мазкур ҳуҷум карда ва бо туфангчаи Макаров таҳдид намуда, дасту пои фурӯшандаи ҳамин мағоза Акбарҷон Маҳмадҷонови 23 — соларо баста, сандуқи оҳанин (сейф) — ро кушода, аз он 4 ҳазор доллари ИМА — ро бо худ гирифта, аз ҷои воқеа ғайб заданд. Аз рӯи ин воқеа парвандаи ҷиноӣ кушода, барои тафтиши он таҳти роҳбарии муовини вазири корҳои дохилии ҷумҳурӣ Шариф Назаров гурӯҳи тафтишотӣ ташкил карда шуд.                    Дар ҷараёни тафтиш муқаррар карда шуд, ки воқеаи ғорат кардани мағозаро худи кормандони он Акбарҷон Маҳмадҷонов ва бародари хурдии ӯ Охунҷон Мамадҷонови 18 — сола ба таври сохтакорона бо мақсади аз худ кардани пул ташкил намуданд.                     Аз дафтари матбуоти Вазорати корҳои дохилӣ ба АМИТ «Ховар» хабар доданд, ки бародарони ғоратгар ба ҳабс гирифта шуданд ва дафтари аъмоли онҳо тафтиш карда мешавад.