КОРМАНДИ МУБОРИЗА БО КОРРУПСИЯРО ҲАБС КАРДАНД

                        Душанбе, 22 май. (АМИТ «Ховар», Бекназари Абӯбакр). — Корманди Агентии назорати давлатии молиявӣ ва мубориза бо коррупсияи Ҷумҳурии Тоҷикистон, полковники адлия Мавлонназар Шерназаров ҳангоми иҷрои вазифаҳои хизматии худ, бо мақсади дар ошкор кардани ҷиноятҳои коррупсионӣ беҳтар нишон додани фаъолияти хеш, моҳи июли соли 2007 ба сохтакории далелҳо даст зада, дар хусуси аз муовини комиссари ҳарбии ноҳияи Хуросон М. Алимардонов гирифтани 100 доллари ИМА протоколи қалбакӣ тартиб додааст. Вобаста ба ин ҳолат, 15 октябри соли 2008 аз ҷониби Прокуратураи генералии ҶТ нисбати М. Шерназаров оид ба сохтакории далелҳо парвандаи ҷиноятӣ оғоз карда шуда, тафтишоти он ба прокуратураи вилояти Хатлон вогузор шуда буд.                    Дар рафти тафтиши парвандаи ҷиноятӣ М. Шерназаров ба ҳабси пешакӣ гирифта шуд.                       Парвандаи ҷиноятӣ баъди анҷом додани тафтишоти пешакӣ барои баррасӣ ба суд фиристода шуд. Дар натиҷа, бо ҳукми суди ноҳияи Ёвон аз 19 майи соли ҷорӣ Мавлонназар Шерназаров дар сохтакории далелҳои парвандаи ҷиноятӣ гунаҳкор дониста шуда, ба ӯ 5 сол ҷазои маҳрумӣ аз озодӣ, бо маҳрум кардан аз ҳуқуқи ишғоли мансабҳои муайян дар мақомоти ҳифзи ҳуқуқ ба мӯҳлати 3 сол ва маҳрум кардан аз рутбаи махсуси палковники адлия, таъин карда шуд.                      Дар ин бора ба АМИТ «Ховар» аз Прокуратураи генералии Ҷумҳурии Тоҷикистон иттилоъ доднд.