МАҶЛИСИ НАВБАТИИ КОМИССИЯИ БАЙНИДАВЛАТИИ ҲАМКОРИИ ИҚТИСОДИЮ НИЗОМИИ СААД

                            Маскав, 18 май. ( АМИТ «Ховар», Ҳалима Хушқадамова). — 20 май дар шаҳри Минск маҷлиси навбатии шашуми Комиссияи байнидавлатии ҳамкории иқтисодию низомии мамлакатҳои аъзои Созмони Аҳдномаи амнияти дастаҷамъӣ баргузор мегардад. Дар он ҷараёни мувофиқа сохтани пешниҳодот дар бораи таҳияи барномаи ҳамкории иқтисодӣ ва низомии мамлакатҳои аъзои созмон то соли 2015, Созишномаи принсипҳои умумии ташкили иттиҳодияҳои байнидавлатии илмию истеҳсолӣ барои тавлиди молҳои таъиноти ҳарбӣ, протоколи таъмини истифодаи муштараки техникию иттилоотии техника ва аслиҳаи ҳарбӣ дар давлатҳои аъзои созмон муҳокима карда мешаванд. Дар маҷлис, инчунин, масъалаи интихоби раиси комиссия, нақшаи кори он дар давоми солҳои 2009 — 2010 ва масъалаҳои дигари ташкилӣ баррасӣ карда мешаванд.                      Маҷлис таҳти раёсати муовини вазири саноат ва тиҷорати Федератсияи Русия, раиси комиссияи байнидавлатии ҳамкории иқтисодию низомии СААД И.Матеров баргузор мегардад. Дар он муншии умумии СААД Н.Бордюжа низ иштирок хоҳад кард.