ШИРКАТИ «БЕТС КОНСАЛТИНГ СЕРВИС ЛТД» 30 – СОЛА ШУД

                        Душанбе, 21 май. (АМИТ «Ховар», Кристина Эрлих). — Ширкати «БЕТС консалтинг сервис ЛТД» — и Бангладеш соли 1979 ба фаъолият шурӯъ карда буд. Имсол 30 — солагии фаъолияти ширкат ва 10 — солагии ҳамкории он бо Тоҷикистон таҷлил карда мешавад.                      Ширкати мазкур дар бисёр мамлакатҳо, аз ҷумла, мамлакатҳои Осиёи Марказӣ, хусусан Тоҷикистон, Афғонистон ва ғайра чандин барномаҳоро амалӣ месозад. Айни ҳол дар он бештар аз 150 мутахассис ва коршинос кор мекунад. Онҳо дар иҷрои қариб 300 барнома дар минтақаҳои гуногуни ҷаҳон саҳм мегузоранд.                      Самтҳои асосии фаъолияти ширкат сохтмони шабакаҳои обрасонӣ, канализатсия, амалӣ сохтани барномкаҳои ҳифзи муҳити зист, истифодаи захираҳои об, рушди кишоварзӣ, нақлиёт, меъморӣ, ба нақшагирӣ ва сохтмони биноҳо ва ғайра мебошад.Ширкати «БЕТС консалтинг сервис ЛТД» айни ҳол дар барқарор сохтани системаи обрасонии шаҳри Душанбе саҳм мегузорад. Ширкат бо ин мақсад барномаи барқарор сохтани шабакаи обрасонии шаҳри Душанберо таҳия намудааст, ки дар давоми се сол иҷро карда мешавад. Барои иҷрои барнома тавассути Бонки рушди Осиё 9 миллиону 220 ҳазор доллари ИМА ҷудо карда шуд. Саҳми Тоҷикистон дар иҷрои барнома 1 миллиону 480 ҳазор доллари ИМА — ро ташкил медиҳад. То имрӯз қариб 70 фоизи маблағи ҷудошуда сарф карда шудааст.                      Тибқи барнома, дар шаҳри Душанбе ва атрофи он силсилаи ҳавзҳои об, бунгоҳи барқии интиқоли оби «Кофарниҳон — 1 « ва «Кофарниҳон — 2» ва ҳавзи калони оби минтақаи ҷанубу ғарбӣ сохта мешаванд. Инчунин, бунгоҳҳои мавҷудаи интиқоли об барқарор намуда, чоҳҳои нави об канда, каналҳои мавҷуда тармим карда, трубопроводҳои нави магистралӣ сохта мешаванд.