ТОҶИКИСТОНУ АФҒОНИСТОН ҲАМКОРИИ ПАРЛУМОНИРО ТАВСИА МЕДИҲАНД

                         Душанбе, 25 май.(АМИТ «Ховар», Марзия Саидова).-Байни Маҷлиси намояндагони Маҷлиси Олии Ҷумҳурии Тоҷикистон ва Вулуси Ҷиргаи Шӯрои Миллии Ҷумҳурии Исломии Афғонистон гурӯҳи дӯстӣ ва ҳамкорӣ созмон дода мешавад. Ин масъала 25 май дар ҷаласаи Шӯрои Маҷлиси намояндагони Маҷлиси Олии Ҷумҳурии Тоҷикистон, ки таҳти раёсати Раиси палатаи поёнии парлумони мамлакат Сайдулло Хайруллоев доир шуд, баррасӣ гардид.                         Дар ҷаласа ҳамчунин, лоиҳаи Қонунҳои Ҷумҳурии Тоҷикистон «Дар бораи суғуртаи мутақобила», «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи фаъолияти оперативӣ-ҷустуҷӯӣ», «Оид ба ворид намудани иловаҳо ба Қонуни Ҷумҳурии Тоҷикистон «Дар бораи яроқ», «Дар бораи Бонки миллии Тоҷикистон», «Дар бораи ҷамъиятҳои саҳҳомӣ», «Дар бораи фарҳанг» ва лоиҳаи Низомнома «Дар бораи Комиссияи марказии интихобот ва раъйпурсии Ҷумҳурии Тоҷикистон» баррасӣ шуданд.                          Раисони Кумитаҳои Маҷлиси намояндагон Мирзошариф Исломиддинов, Абдуманнон Холиқов, Гулчеҳра Бозорова, Сафаралӣ Раҷабов ва Абдураҳмон Азимов масъалаҳоро тавзеҳ дода, зикр карданд, ки лоиҳаи қонунҳои зикршуда, дар роҳи ба танзим даровардани фаъолият дар самти суғуртаи мутақобила, таҳкими кор ва андешидани тадбирҳои мушаххас дар бахши фаъолияти оперативӣ-ҷустуҷӯӣ, рушди фарҳанг ва тақвияти ҳамкории дӯстонаю судманд бо парлумони кишвари ҳамҷавор Афғонистон мусоидат менамоянд.