БУЗУРГДОШТИ ХУМАЙНӢ ДАР ДУШАНБЕ

                   Душанбе, 5 июн.(АМИТ «Ховар», Марзия Саидова).-Бахшида ба 20-умин солгарди даргузашти Роҳбари инқилоби исломии Эрон Оятуллоҳ Имом Хумайнӣ дар маркази фарҳангии «Ориёно»-и Душанбе маросими бузургдошти ин шахсияти бузурги сиёсӣ доир шуд.Сафири фавқулодда ва мухтори Ҷумҳурии Исломии Эрон дар Ҷумҳурии Тоҷикистон Алиасғари Шеърдӯст зимни саханронии худ доир ба нақш ва таълимоти ин шахсият ибрози назар кард. Мавсуф гуфт, ки нақши Имом Хумайнӣ дар бозгашти инсон ба ҳувияту худшиносии миллӣ эҳёи арзишҳои илоҳию ахлоқӣ ва таваҷҷӯҳи инсон ба тавонмандиҳои худ беназир аст. Ҳамчунин зикр шуд, ки Имом Хумайнӣ эҳёгари бузурги маънавият ва инсонгароӣ дар садаи бист шинохта шуда, дар асоси ақидаҳо ва таълимоти ӯ мардум ба мубориза бархоста режими 2500-солагии шоҳаншоҳиро дар Эрон барҳам доданд. Ва имрӯз ин давлат ба ҳайси яке аз кишварҳои қудратманди минтақа ва ҷаҳон ба шумор меравад.                  Дар маросими бузургдошти даргузашти ин шахсияти шинохтаи сиёсӣ ҳамчунин китоби нависандаи эронӣ Ҳамидаи Ҳоирипур «Даре аз ҷаҳони ғайб», ки аз ҷониби муҳаққиқ ва рӯзноманигори тоҷик Қиёмиддин Сатторӣ аз форсӣ ба кириллӣ баргардонида шудааст, муаррифӣ гардид. Дар китоб Паёми таърихии Имом Хумайнӣ ва насиҳатҳои падаронаи ӯ ба нахустин ва охирин Президенти собиқ Иттиҳоди Шуравӣ — Михаил Горбачёв, ки 1 январи соли 1989 фиристонида шуда буд, ҷой дода шудааст.