МАКТАБИ ТОБИСТОНАИ ТАЪРИХШИНОСОНИ ҶАВОН

                 Ереван, 16 июн. (АМИТ «Ховар», Ҳалима Хушқадамова).- Дар пойтахти ҷумҳурии Арманистон- шаҳри Ереван Мактаби тобистонаи байналхалқии таърихшиносони ҷавони мамлакатҳои Иттиҳоди давлатҳои мустақил кушода шуд. Мавзӯи имсолаи машғулиятҳои он «Таърихи имрӯза ва омӯзиши таърихи мамлакатҳои ИДМ» мебошад.                 Директори Пажӯҳишгоҳи таърихи умумии Академияи илмҳои Федератсияи Русия Александр Чубарян аҳамияти фаъолияти муштараки илмии олимони ҷавонро таъкид намуда, диққати иштирокчиёни маросими ифтитоҳи мактабро ба бештар сохтани теъдоди мамлакатҳо дар фаъолияти мактаб ҷалб намуд.                 Мухбири АМИТ «Ховар» хабар медиҳад, ки Мактаби байналхалқии тобистонаи олимони ҷавони мамлакатҳои ИДМ дар Ереван 4 сол боз фаъолият дорад. Олимони ҷавони мамлакатҳои гуногун ба туфайли он бисёр масъалаҳои баҳсноки таърихиро якҷоя таҳқиқ менамоянд. Мактаби мазкур бо ташаббуси Пажӯҳишгоҳи таърихи умумии Академияи илмҳои Русия ва дастгирии Фонди байнидавлатии ҳамкории гуманитарии давлатҳои ИДМ таъсис дода шуд. Дар фаъолияти мактаб намояндагони Арманистон, Белорусия, Қазоқистону Қирғизистон, Молдавияю Русия, Тоҷикистону Ўзбекистон ва Украина ширкат меварзанд.