МУЛОҚОТИ ҲАМРОХОН ЗАРИФӢ БО САФИРИ НИДЕРЛАНДИЯ

                        Душанбе, 10 июн. (АМИТ «Ховар» Наргис Бояхмедова).- Вазири корҳои хориҷии Ҷумҳурии Тоҷикистон Ҳамрохон Зарифӣ дирӯз бо сафири кабири шоҳигарии Нидерландия дар Тоҷикистон Клаас Ван Дер Темпел бо сабаби ба охир расидани мӯҳлати хизмати дипломатиаш дар мамлакати мо мулоқот кард. Зимни сӯҳбат вазъи имрӯза ва нақшаҳои ояндаи муносибатҳои ҳар ду кишвар дар соҳаҳои гуногун, баъзе масъалаҳои байналхалқиву минтақавӣ, вазъияти Афғонистон ва Покистон муҳокима шуданд. Мусоҳибон дар бораи ҳамкории иқтисодии Тоҷикистону Нидерландия сухан ронда, қайд карданд, ки содир намудани алюминий аз Тоҷикистон ба ин мамлакат ҷузъи муҳими ҳамкории онҳоро ташкил медиҳад.                       Зикр карда шуд, ки Нидерландия дар Тоҷикистон барномаҳои гуногунро амалӣ месозад.                       Вазири корҳои хориҷии Тоҷикистон пешниҳод кард, ки вобаста ба мавҷудияти проблемаҳои обу энергетика мутахассисони Нидерландия дар ташхиси мустақилона ва омода сохтани ҳуҷҷатҳои техникию иқтисодии иншоотҳои гиндроэнергетикии Тоҷикистон ширкат варзанд.