ПАНҶ ДОНИШҶЎИ ТОҶИК ДАР МАҲБАС НИГОҲ ДОШТА МЕШАВАД

                  Қоҳира, 3 июн. (АМИТ «Ховар», Наргис Бояхмедова).- Роҳбари дафтари матбуоти Вазорати корҳои хориҷии ҷумҳурӣ Давлат Назриев ба АМИТ «Ховар» хабар дод, ки дар пойтахти Миср-шаҳри Қоҳира 5 донишҷӯи тоҷик то имрӯз дар маҳбас нигоҳ дошта мешаванд. Онҳо Шавкат Рамазонов, Хуршед Эрматов, Фаридун Гулов, Идибек Зиёвиддин ва Аъламшо Шарифов мебошанд. 11 донишҷӯи дигари тоҷик аз маҳбас ҷавоб дода шуданд.   Донишҷӯёни озодшуда бо кормандони Сафоратхонаи Тоҷикистон дар Миср мулоқот карданд. Қайд карда мешавад, ки донишҷӯён аз кормандони мақомоти муҳофизи қонуну тартиботи Қоҳира ягон шикоят надоранд. Бояд гуфт, ки қисми зиёди донишҷӯёни тоҷик мустақилона барои таҳсил ба Қоҳира рафтаанд. Кормандони сафоратхона дар масъалаи озод кардани донишҷӯён бо мақомоти дахлдори Қоҳира гуфтушунидро давом медиҳанд.                 Ёдовар мешавем, ки мақомоти амниятии Миср шаби 27 май дар маҳалли истиқомати донишҷӯёни Тоҷикистон, Ўзбекистон, Қазоқистон ва Русия, инчунин баъзе мамлакатҳои Аврупо амалиёти махсус гузаронида, шумораи зиёди донишҷӯёнро дастгир карда буданд. Дар байни дастгиршудагон 14 донишҷӯи тоҷик низ ҳаст.