С. ХАЙРУЛЛОЕВ: «ҚОНУНҲОИ ҚАБУЛШУДА ҶАВОБГӮИ ТАЛАБОТИ ЗАМОНАНД»

                  Душанбе, 30 июн.(АМИТ «Ховар», Марзия Саидова).-«Дар давраи фаъолияти иҷлосияи 5-уми Маҷлиси намояндагони Маҷлиси Олии ҷумҳурӣ давъати сеюм 138 қонун қабул карда шуд, ки аз он 60 -тоаш қонунҳои конститутсионӣ мебошанд», гуфт зимни маърӯзаи худ раиси палатаи поёнии парлумони кишвар Сайдулло Хайруллоев 30 июн дар иҷлосияи 5-уми Маҷлиси намояндагон. Ҳамзамон, дар ин давра аз ҷониби Маҷлиси намояндагон 55 қарор қабул гардида, 17 Созишнома ва 5 Аҳднома ба тасвиб расонида шуд. Қонунҳои қабулшуда, ҷавобгӯи талаботи замона ва меъёрҳои байналмилалӣ буда, нақши онҳо дар рушди иқтисодиёти миллӣ ва тақвияти муносибатҳои хориҷии Ҷумҳурии Тоҷикистон бо созмонҳои бонуфузи байналмилалӣ ва давлатҳои мутараққии ҷаҳон бузург аст.                  Инчунин, ду маротиба муҳокимаи парлумонӣ сурат гирифт, ки дар он масъалаҳои муҳими рушди иқтисодиёти мамлакат бо иштироки вакилон ва аъзои Ҳукумати ҷумҳурӣ баррасӣ гардиданд. Аз ҷониби шаҳрвандон ба парлумони кишвар 544 муроҷиат расид ва 412 нафар шаҳрвандон аз ҷониби намояндагони парлумони кишвар қабул гардиданд.                  С. Хайруллоев доир ба таҳкими ҳамкории Маҷлиси намояндагон бо созмонҳои бонуфузи парлумонӣ ва кишварҳои дунё сухан карда гуфт, ки дар ин давра байни Маҷлиси намояндагон ва Вулуси Ҷиргаи Афғонистон гурӯҳи дӯстии парлумонӣ созмон дода шуд. Ҳамзамон, сарони кишварҳои Хорватия ва Туркия зимни сафари расмии худ ба Тоҷикистон аз Маҷлиси намояндагон боздид намуда, бо фаъолияти ин мақоми олии қонунгузор шинос шуданд.                   Инчунин, С. Хайруллоев доир ба касбияти вакилони Маҷлиси намояндагон дар роҳи эҷоди қонунҳо ва таҷрибаи намояндагии онҳо, ки ба рушди парламентаризм дар кишвар мусоидат менамоянд, ибрози назар кард.