ЎЗБЕКИСТОН ИНТИҚОЛИ ГАЗРО БА ТОҶИКИСТОН ҚАТЪ КАРДАН МЕХОҲАД

                  Душанбе, 12 июн. (АМИТ «Ховар», Кристина Эрлих).- Ҷамъияти саҳҳомии «Узтрансгаз» ба унвони ҷамъияти саҳҳомии «Тоҷиктрансгаз» мактуби расмӣ фиристода, огоҳ кард, ки дар мавриди то 15 июн бознагардондани қарзи гази қаблан истифодашуда интиқоли газро ба Тоҷикистон қатъ менамояд. Муовини аввали ҷамъияти саҳҳомии «Тоҷиктрансгаз» Шавкат Шоимов ба мухбири АМИТ «Ховар» хабар дод, ки ҷониби Ўзбекистон дар ин масъала қабл аз ин ҳам чандин маротиба огоҳинома фиристода буд, вале интиқоли газ қатъ карда нашуд. Тоҷикистон имрӯз аз ҷамъияти саҳҳомии «Узтрансгаз» қариб 18 миллион доллари ИМА қарздор мебошад.                «Қарзи мазкур аз ҳисоби напардохтани маблағи гази истифодашуда дар корхонаҳои калони мамлакат, аз ҷумла ҷамъиятҳои саҳҳомии «Барқи тоҷик», «Корхонаи семент», «Сомонсуғдгаз», корхонаи шишабарории «Лаъл» ва ғайраҳо ба вуҷуд омадааст.   Вақте ки ин корхонаҳо пули гази истифодабурдаашонро диҳанд, имконияти баргардондани қарзи ҶС «Узбтрансгаз» пайдо хоҳад шуд»,- гуфт Ш. Шоимов.